Mizoram-a hmasawnna hnathawh mek thlirin Mi-PRAGATI thutkhawm vawi 6-na neih a ni
CM Conference Hall-a Mizoram Pro -Active Governance and Timely Implementing (Mi-PRAGATI) thutkhawm neih ah hian Mizoram-a hmasawnna hna thawh mek dinhmun thlirho niin Kaladan Multi-Modal Transit Transport Project (KMMTTP) Road-a Mizoram chhunga hnathawh tawh chin, tuna chhe leh tawh te chu a rang lama siamtha turin thutkhawm a tel Ministry of Road Transport & Highways aiawhte chu hriattir an ni a. Zangnadawmna la chinfel lohte pawh chingfel thuai tura ngen an ni a. Ministry of External Affairs hnuaia thawh Paletwa - Kaletwa - Zochachhuah inkar pawh a dinhmun ngaihthlak a ni a. Paletwa - Zorinpui inkar kawngpui thawh mek hi KM 109.2 a thui a ni a, tunah hian Physical Progress hi 23.35% niin Financial Progress chu 30% a ni.
Sairang atanga Hmawngbuchhuah thlenga Rel kawng sial tur chungchangah Railway lamin an hmalak tawh chin an tarlang a, Sairang Rel Station tihchangtlunna hna thawh mek pawh an sawifiah nghal bawk a, Railways te hmalakna chungchang bik hi hun hranah Chief Minister kaihhruainain thutkhawm neia la thlirho leh tur a ni ang. Hei bakah hian Indo - Bangladesh Border Fencing cum Road, Rajiv Nagar Segment chungchang pawh he hunah hian sawiho a ni bawk a, Online hmanga Meeting-a tel Ministry of Home Affairs aiawhten hma an lak tawh chinte an sawifiah a. Kawng chhe tawh lutuk chu a rang lama siamthat a tul thu tarlan a ni a, harsatna dangte pawh sawichhuah a ni bawk.
Hengte bakah hian Cyber Crime leh Digital Arrest chungchanga Mizoram State Cyber Crime Coordination Centre hmalakna leh hnathawh te, Aizawl to Tuipang National Highway hnathawhin a nghawng, la chinfel loh thil thenkhatte pawh he hunah hian sawiho a ni bawk a. Nimin-a thutkhawm ah hian PWD Minister Vanlalhlana, EF&CC Minister Lalthansanga, Agriculture & Farmers Welfare Minister PC. Vanlalruata leh Official pawimawh dangte an tel a. Online-in Delhi leh Mizoram hmun hrang hrang atangin agenda kaihhnawih Official pawimawh ten lo an zawm bawk a ni.