Mizoram-ah National Games-a Weightlifting inelna nei dawn

Nakum (2027)-a National Games vawi 39-na neih turah Mizoram chuan Weightlifting discipline thleng tura sawmna a dawn avangin nimin khan Sports & Youth Services Department changtu Minister Lalnghinglova Hmar hovin a Office-ah sawrkar mi pawimawh ten hemi chungchang hi an sawiho.
39th National Games hi Meghalaya-in nakum (2027) February leh March thla chhung khian a thleng dawn a. He Games-ah hian hmarchhak State hrang hrangte chu discipline pakhat theuh Co-Host tura beisei niin Mizoram chuan Weightlifting discipline thleng tura sawmna a dawng a; hemi chungchangah hian nimin khan Mizoram Sports Minister chuan Meghalaya Sports Minister leh Northeast Sports hotute bepawp nghalin Mizoram in a thleng dawn a nih chuan sum inruahman dan tur chungchangte leh a hmunhma turte an sawiho a. Ministry lam atanga thu chiang zawk ngaihchan mek niin tun dinhmunah thutlukna felfai siam theih a la ni rih lo a ni.

He thutkhawmah hian Sports & Youth Services Department hotute, Mizoram State Sports Council hotute, Mizoram Weighlifitng Association hruaitute leh a kaihhnawih Department hrang hrang hotute telin Sports Minister Lalnghinglova Hmar chuan hemi atana Mizoram Weightlifting Association te inbuatsaihna leh thahnem ngaihnaah lawmthu sawiin, Mizo thalaite tan kawng zau zawk a inhawn zel theih nan theihtawpa hmalak zel a nih tur thu a sawi a ni.

National Games hi Indian Olympic Games/All India Olympic Games tiin kum 1924 khan neih tan nin kum 1940 khan ‘National Games’ tih hming a pu a, kum 1985 atang khan Olympics anga siamthain Indian Olympic Association chuan a kalpui a ni.