Mizoram-ah March 2027-a Natural Gas hmang ve hman tura hmalak a nih thu Minister in a sawi
Indradhanush Gas Grid Limited (IGGL)-in Tripura-a Panisagar atanga Sihhmui, Mizoram thlenga Natural Gas kalna tur pipeline an phum chungchanga hmalakna leh harsatna awm te chu nimin khan FCS&CA MinisterB. Lalchhanzova hovin a Pisa-ah sawiho a ni a, he hunah hian Minister chuan khawvel boruak ralmuang lo leh Gas kan chawkluhna ram te an indo avangin eirawngbawlna gas-ah kan phang tih sawiin, “Gas Pipeline atanga Natural Gas hmang State te erawh chuan harsatna an tawk lova. Mizoram-ah pawh March 2027-ah chuan hei hi hmang ve hman tura hmalak a ni,” a ti a. Tuidam leh Darlak inkar KM 1.5 tuna IGGL ten hna an thawh mek chu pipeline phumna turah harsatna an tawh thu IGGL hotuten an sawi a. Minister hian October thla chhunga IGGL, Food Civil Supplies and Consumer Affairs Department, Public Works Department leh DC Mamit te nen a hmunah ama hova en nise tiin Department hotute chu ruahmanna siam turin a chah nghal a ni.
Supply Minister chuan Mizoram Sawrkarin IGGL gas pipeline chu a hunah tha taka zawh a nih theih nan theihtawp a chhuah pui zel dawn tih sawiin, FCS&CA bakah Commerce and Industries Department te pawh an inhawn thu a sawi a, IGGL leh Tripura Natural Gas Company Limited lam te ram mamawh pawh Land Acquisition a rang thei anga an tih fel sak zel thin thu leh hmalakna dang te pawh an umzui sak zel dawn thu a sawi a ni.
He hunah hian FCS&CA Secretary Ravi Dadhich chuan Contractor ten chak zawka hna an thawh theih nan IGGL hotute hnenah Mizoram a hnathawh chu thil awlsam tak a ni lo tih chu hna tan hmaa an hriat sa a nih avangin hei hi hnathawh muan nan chhuanlam a tling lo tih a sawi a. India Sawrkar project pawimawh, hunbi nei a nih angin tan mar a tul thu a sawi bawk.