Mipuite hriselna chawikan sawrkar in a ngaih pawimawh thu Minister in a sawi
Nimin khan Aizawl-a Central YMA Hall-ah ‘Ayurveda Day’ vawi 11-na lawmna neih niin he hun a hmanpuina ah Health Minister Lalrinpuii chuan Sawrkar Laipui leh Mizoram Sawrkar, Health & Family Welfare Department chuan mipuite hriselna chawikan chu an ngaih pawimawh ber te zinga a mi a ni tih sawiin, “National Ayush Mission kaltlangin Mizoram-ah Ayush Health and Wellness Centre-te dinin hma lak zel a ni a, mi tin banphaka Ayush Doctor an awm ta te hi hriselna kawnga kan ram hmasawnna a ni zel a ni,” a ti a. Health Care Delivery-ah Modern Medicine chauh rinchhan lovin, kan hnam zia leh kan ram leilung nena inrem Ayurveda leh AYUSH system-te chu theihtawpa chhawmnun leh chawikan zel an tum tlat thu a sawi bawk.
Health Minister chuan kan nunphung inthlak danglam vangin Non-Communicable Diseases- Zunthlum, Thisen Sang, Cancer leh Lung lam natna a hluar tual tual tih pawh sawiin, heng natna dona kawngah Ayurveda thuken—natna laka inven hmasakna (prevention), taksa, rilru leh leilung inrem taka nunho theih te chu chhanna pawimawh tak a nih thu a sawi a, kumin thupui, ‘Ayurveda for a healthier tomorrow’ (Hma hun hrisel zawk atan Ayurveda) chu kan tunlai khawvel nen pawh a inmil hle niin a sawi bawk.
Nimin-a he hun hman ah hian Ayurvedic Pharma-covigilance (damdawi khuahkhirh leh dik taka hmanna) chungchang sawizauna (awareness) neih a ni bawk a. Health Minister chuan Pharmacovigilance chu a pawimawh tak zet tih sawiin, “Ayurveda damdawi kan hmanin a dik, a him leh a tha ber chauh mipuite hnen a thlen theih nan kan AYUSH Doctor leh Health Worker-te hian mawhphurhna lian tak an nei a, mipuite rintlaka kalpui zel a tul a ni,” a ti a. Mizoram chu ramhmul damdawi-ah kan hausa hle tih pawh sawiin, thil thar rinchhan lutuk lova hriselna tluantling kan neih theih nan Ayurveda zirtirna chu nitin nunah sengluh theuh tum turin he huna kalkhawmte chu a sawm a. Dina charya (Healthy Daily Regiment) chungchang thlirho a ni bawk.