Mi 135 ten an Pension Payment Order an thehlut tawh

Mizoram sawrkarin dan lova pension la ten anmahni duhthu a an pension lakte an tihtawpna tura a ruahmanna hnuaiah Pension Payment Order (PPO) surrender tawh mi 135 an awm tawh.
Nimin chhun dar 12:00 thleng khan Aizawl South Treasury-ah mi 56, Aizawl North Treasury-ah mi 11, Lunglei Treasury-ah mi 34,  Kolasib leh Champhai Treasury-ah mi 6 ve ve, Siaha Treasury-ah mi 5, Mamit Treasury-ah mi 4, Serchhip, Siatual leh Khawzawl Treasury-ah te mi 3 theuh, Hnahthial Treasury-ah mi 2, Lawngtlai leh Chawngte Treasury-ah mi pakhat ve ve ten Pension Payment Order (PPO) an surrender tawh a ni.

Accounts & Treasury hotute chuan, Mizo-ram sawrkar hnuaia dan ang taka Family pension la thei tawh lo, Pension Rules-in a huam tel loh leh lak a phal tawh loh te zingah document dik lo hmanga family pension la zui mek engemaw zat an awm a; hetianga dan phal loha Family Pension latute hi anmahni duhthu ngeia tihtawpna hun chu July ni 1, 2026 atanga tun thla, September ni 30 thleng hian hun an hawn sak a,  'Voluntary Surrender of Pension Payment Order' hman mek hi a ral hnuah Task Force hmangin Family Pension la te hi endik an ni dawn a. Dik lo taka Family Pension la an la awm a, hmuhchhuah an nih chuan dan hmangin hrem an ni dawn tih Treasury hotute chuan an sawi a ni.