Zirlai intihduhdahna awm thin tihbo dan tur rel a ni

Nimin khan Serchhip-ah District Level Anti-Ragging Committee chu Bawrhsap Paul L. Khuma hova thukhawmin zirlaite zinga intihduhdahna thleng thin leh rilru leh taksa in tihnat sakna (ragging/bullying) thleng thin laka zirlaite an him theihna tura hmalak dan tur hrang hrangte sawiho a ni.
He thutkhawm Serchhip DC Meeting Hall-a neih ah hian Serchhip District chhunga School zawng zawngah Anti-Ragging Committee leh Squad din a nih tawh thu District Education Officer (DEO) chuan a sawi a. Zirlaite'n Admission tih laiin ragging an ti dawn lo tih intiamna ‘Anti-Ragging Bond’ an ziah dan tur te, Ragging/bullying tawkte'n awlsam zawka an complaint theih dan tur te, Institution tin ten Anti-Ragging Report mumal taka an vawn dan tur te leh Dan bawhchhiate chunga hremna kalpui dan tur chung-changte sawiho a ni a. Venhimna leh inzirtirna te nei turin Police-ten thla tin School an tlawh/vil (patrol) thin dawn a; Awareness leh Counseling Session hrang hrangte buatsaih thin a ni dawn bawk a ni.

Nimin vek khan Ragging chungchanga School tinte hriattur pawimawh inkawhhmuhna leh Criminal offence/intimidation a nih theih dan te inzirtirna tur Module siam turin Addl. Deputy Commissioner Dorothy Muansangi kaihhruai Drafting Committee din nghal a ni bawk.