IWRD thuamchak sawiho

Nimin khan Chief Minister Lalduhoma hovin a Office Conference Hall-ah Irrigation & Water Resources Department thuamchak dan tur chu GAD, DP&AR, Finance leh Irrigation & Water Resources Department hotuten an sawiho a. IWRD hi tunhma chuan ‘Minor Irrigation’ tih thin niin tunah chuan Irrigation Development chauh ni lovin River Basin Planning te, Springshed Development te, Integrated Water Resources Management te, Hydrological Data Management te, Flood Management & Warning te, Multipurpose Reservior leh Ground Water Development thlenga a thawh tak avangin Project lian tak tak a khawih mek a. Technical support nasa zawk a mamawh hle nia ngaih a ni a. Chief Minister chuan Department tam tak chu thawktu indaih lo, kum rei tak chhung a ngai renga lo kal tawh, thawktu tlem vanga tluchhe mai thei an ni hlawm tih sawiin, “IWRD pawh kum 19 kaltaa in dinhmun ngai rengah khan in la awm a, hmalakna in ngah bawk si a. Department dangte dinhmun hre reng chungin an harsatnate kan ngaithla hmasa a ni,” a ti bawk.