Lunglei District tan Smart VC Application tlangzarh
Mizoram Bana Kaih (Handholding) Scheme hnuaia Mizoram District Transformation Programme (MDTP) kaltlanga Lunglei District Catalytic Intervention Plan (DCIP) atanga siam Smart VC Application (Android & iOS with Mizo AI Assistant) tlangzarhna Lunglei District Education Office Complex Conference Hall-a neih ah hian Addl. DC, Zoramdini chuan Mizoram Bana Kaih Scheme hnuaiah Mizoram District Transformation Programme kaltlangin DC kaihhruaina hnuaiah Lunglei District-ah hmasawnna hrang hrang thawh chhoh mek a nih thu sawiin, DLAO-in District Catalytic Fund atanga thil tangkai tak tur ngaihtuah nachang a hria chu fakawm a tih thu a sawi a. Lunglei District-a VC-te'n tunlai hmasawnna mila application tha tak an hmang thei tur chu a lawmpui thu sawiin, Smart VC App-in a tum ber chu VC langtlang siam a nih thu a sawi a, langtlang taka eng kim kalpui a nih dawn avangin a nih tur anga dik tak leh tha taka hman tum turin a chah bawk.
Smart VC Application hi Lunglei District chhunga Village Council-te'n an hman tur niin, VC lehkha pawimawh zawng zawng chhinchhiah leh dahluh nan hman a ni dawn a. VC-te'n DLAO Office-ah mahni kal kher lova lehkha pawimawh an thehluh nan te, DLAO Office atanga hriattirna pawimawh thawnchhuah nan leh hnathawh dan endik nan te tangkai taka hman theih a ni dawn a. VC inrelbawlna leh hnathawh langtlang a awm theihna tura ruahman niin, VC leh VC-te inbiak-pawhna leh thu leh lehkha inthawn tawnna te a awm tel bawk a. A tlangzarhna hun hi Lunglei DLAO Beitlotha Nohro chuan kaihruaiin LushAITech atangin mithiam ten VC tin aiawha a tel te chu he App hman dan hi an zirtir nghal a ni.