Larsap in tunlai thiamna hman a tul thu a sawi
Inrinni kaltaa ‘Engineering India's Global Footprint : Technology, Talent & Trust’ tih thupui hmanga The Institution of Engineers (India) buatsaih IEI Industry & Education Excellence Summit & Award New Delhi-a hmanna ah Larsap chuan India hmarchhak State-te chu hmun chhengchhia, a ram leilung venthawn ngai leh India rama hmun pawimawh taka awm an nih thu sawiin, hmarchhak ram leilung chhengchhe tak chu engineer tana chona leh a taka thiamnate lantirna a nih thu a sawi a. India ram hmalam thui tak chu Engineer-te kutah a innghat tlat tih sawiin, ram changkang Viksit Bharat @2047 thlen theih na’n theihtawp chhuah turin a chah a ni.
Larsap chuan India ram hmasawnna rahbi zawh mekah Engineer ten hmun pawimawh tak an chan thu sawiin, khawvel thiamna sang zelah ram hrang hrangte chu thil dehchhuah hralhna mai ni lo, thiamna neih leh mar pat-a tanlak kawngah an inel mek tih a sawi a. India ramin thiamna leh theihna tam tak a neihte tangkai taka chhawr thiam a tul tih sawiin, Engineering thiamna hmanga hnathawhte chu hna tha, tlo leh rintlak tia hriat hlawh a nih theih nan Engineer-te theihtawp chhuah turin a chah a ni.
Digital India, van sang boruak zirna leh thiamna, Geospatial Technology, Defence Engineering, Artificial Intelligence leh tunlai thiamna hrang hranga ram dinhmun leh tun aia hmasawn tura Engineer-te mawhphurhna leh tanlak ngaihna laite pawh Larsap chuan tarlangin, India ram thiamna leh theihnate ram dang ten an rin ngam theih nan ramchhung thil dehchhuahte a tha tawk em tih leh tehkhawng a pha em tih thlenga ngaih pawi-mawh a tul thu a sawi bawk.