Larsap hovin Hindi Ni lawmna Aizawl-ah neih a ni
Greenhill Public School, Aizawl buatsaih Hindi Diwas lawmna ah hian Larsap General (Dr) Vijay Kumar Singh chuan Hindi thiam a pawimawh thu leh zirna kawnga danglamna siam a tul thu sawiin, kan hnam ziarang behchhan leh vuan chung zelin inthlak danglamna kan kalpui tur a nih thu leh a nih loh chuan hlawhtlinna kan nei thei dawn lo tih a sawi a. Mizoram in talent tha tak tak a neih tam thu sawiin, “Kan talent-te hi State chhungah chauh a tawp mai loh nan State pawn leh khawvel hmun dang thlenga kan phochhuah a ngai a, hemi tur hian tawng dang kan zir a pawimawh a ni,” a ti bawk. Larsap chuan Tawng dang thiam chu zirna, hnathawhna, sumdawnna leh khualzin dawnsawn kawnga a tangkai thu pawh sawiin, “Tawng thiam tur chuan tihsual palh pawh a awm thei, mahse hlauh loh tur, tih dik lohna atang zel hian kan inzir thin a ni,” a ti a. Mizoram sawrkarin zirna In-ah ‘Karkhata nikhat Hindi tawng hman ni’ kalpui a tum chu lawmawm a tih thu sawiin, Zirlaite chu midangte hnam ziarang, nunphung leh tawng zir turte, lehkhabu chhiar zau tur leh India history-te zir nasa turin a chah bawk.
Larsap chuan khawvel thang chak takah zirlai ngawr ngawra tih that a tawk lo tih sawiin, hriatzauna, themthiamna, nungchang mawi, inthununna, inrintawkna bakah khawtlang leh ram tana inpekna neih tel a pawimawh thu a sawi bawk.
He hunah hian Khualzahawm School Education Minister Dr. Vanlalthlana chuan India chu ram zau leh ze hrang hrang nei, tawng hrang hrang awmna a nih avangin mipui tam zawkte tawng hman Hindi thiam a pawimawh thu a sawi a. Hindi chuan midangte nena inbiakpawh leh hna thawh kawngah awlsamna a thlen thu sawiin, Mizo hnam ziarang leh nihna hloh chuang lovin Hindi tawng hi zirin tangkai takin kan hmang thei a ni tih a sawi a. Modern Education-ah tawng chu exam atan mai ni, a taka hmang thei tura zir ngaih pawimawh a nih thu sawiin, Mizoram Education Reform Committee-in Hindi tawng zir a pawimawh zia hriain ‘Kar khata ni khat Hindi tawng hman ni’ rawtna an siam a, hei hi bawhzuiin Guide Book-te pekchhuah a nih thu a sawi bawk.
He hunah hian Greenhill Public School Director Rev. Dr. K. Thanzauva chuan kalkhawmte lawmna thu sawiin. Hindi Concert neih zui a ni a, Cultural Items chi hrang hrang Greenhill Public School zirlai leh zirtirtute bakah Pradhan Mantri Rastriya Bal Puraskar-Awardee Esther Hnamte ten an entir bawk a ni.