Kolasib Bialtu MLA leh Assembly Deputy Speaker Lalfamkima chuan nimin khan ‘Lalremsiami Hockey Playground’ siamna hmun tura ruahman, Kolasib Diakkawn GSA Playground chu a hmunah kalin a enfiah. Deputy Speaker Lalfamkima chuan, Mizoram Sawrkarin Mizo nula, infiammi chhuanawm Lalremsiami chawimawina atan a hming chawiin he Hockey khelmual hi ruahman a nih thu sawiin, Khelmual hming atan hian 'Lalremsiami Hockey Ground, Diakkawn Field' tih a nih dawn thu a sawi a. Kumin August ni 18 khan infiammi 17 zingah Lalremsiami hian India rama infiammite chawimawina sang, Arjuna Award a dawn thu a sawi bawk.
Diakkawn GSA Ground hi a vang metre 81 leh a dung metre 113 niin Kolasib Diakkawn GSA leh Kolasib District Hockey Association inremna angin a zawl awmsa zawng chu Hockey khelmual atana ruahman a ni a. He inremna hi kum 3 chhung atana tih phawt niin, a tul dan anga pawhsei theih a ni ang a; kum 2028 thlenga Sawrkar hmalakna a awm lo a nih chuan inremna hi hnuhkir leh tur a ni ang.
