Kumin-ah chenna In kang 27 awm tawhin mi pakhat a kanghlum
Akashvani News Aizawl zawhna chhangin Fire & Emergency Services Department hotute chuan kumin 2026 January thla atanga August thla tawp thleng khan Mizoram hmun hrang hrangah chenna In kang 27 leh ram kang 36 a awm tawh thu an sawi a, heng bakah hian bawlhhlawh paihna, Distribution Box, Lirthei leh thildang kang report 18 an dawng tawh bawk tih sawiin, mi pakhat in nunna a chan tawh bawk tih an sawi a ni.
Kumin-a kangmei chhuakin thil a tihchhiat hlut zawng hi Rs. 3,07,78,030 hu vel nia chhut a ni a. February thla kha kangmei chhuah tam ber thla niin hemi thla ah hian chenna In 7 a kan bakah ramkang 20 awmin, Distribution Box 2 leh bawlhhlawh paihna hmun pakhat a kang a, February thla chhunga kangmei chhuakin a tihchhiat hlut zawng chu Rs. 1,34,22,000 hu a ni a, June thlaah chenna In leh ramkang report a awm lova, lirthei kang report pahnih a awm thung.
Fire & Emergency Services Departmet hotute chuan kangmei chhuah chhan tam ber chu fimkhur tawk loh vang a nih thu pawh sawiin, mitin te kangmei laka In leh a vel a him theih nan fimkhur theuh turin an chah bawk a ni.