Kum khat chhungin Rel-a chuang an tam

Sairang thlenga Rel service a awm atanga kum khat chhungin khualzin 5,54,000 vel an awm tawh.
Nimin Sept. 13, 2026 kha Prime Minister Narendra Modi-a’n Sairang thlenga tlan tur Rel a vailiam atanga kum khatna a ni a, Press Information Bureau (PIB) thuchhuahin a tarlan danin, nikum September ni 13-a hawn Sairang Rel Chawlhmun-ah hian vawi 1,100 chuang Rel a chhuakin a thleng tawh a, mi 5,54,000 vel Rel service hrang hrangah hian chuang tawhin, ni tin Rel-a chuang mi 3,300 vel awm anga chhut a ni. Sairang Rél service hian kum khat chhung hian Indian Railways tan cheng vbc. 54 vel a hmuchhuak tawh a ni.

Bairabi leh Sairang inkar Rel Service siamna atan hian November ni 29, 2014 khan lungphum phum a ni a, cheng vbc 8,071 senga siamin, nikum September ni 13 khan hawn a ni a. Bairabi leh Sairang inkar Rel kawng hi kilometer 51 leh metre 38-a thui niin Rel Chawlhhmun pali - Hortoki, Kawnpui, Mualkhang leh Sairang-ah te a awm an ni. Bairabi atanga Sairang Rel Station inkarah hian Leiverh 45 a awm a, leiverh zawng zawng sei zawng belhkhawm hi kilometre 12 leh metre 853 a ni. Lei lian (major bridge) 55 leh Lei tê (minor bridge) 88 a awm a; Lei sang ber, Kurung lui chunga dawh hi metre 114 a sang niin, Delhi-a Kutub Minar aia sang zawk a nih bakah India rama Rel Lei sang ber dawttu a ni.