Kum 2024 atanga 2026 chhunga Mizoram-a mahni intihlum zingah mipa an tam
Kar kalta Ningani, September 10, 2026 khan mahni intihhlumna laka invenna leh inzirtirna ni, ‘World Suicide Prevention Day’ hmangin he huna tarlan a nih danin Mizoram-a mahni inthlum zingah hmeichhia aiin mipa an tam zawk a, tunhnaiah mahni intihlum zinga hmeichhia aia mipa an tam zawkna hi 85.45% a tling a ni. Mizoram Police chhinchhiah danin mahni intihlum hi kum 2024 khan mi 46 an awm a, an zinga 43 hi mipa niin midang 3 chu hmeichhia an ni a. Kum 2025 khan mi 32 intihlum awmin mipa 26 leh hmeichhia 6 an ni a, kumin 2026 chhinchhiahna hnuhnung ber thlengin Mizoram-ah mahni intihlum mi 32 awm tawhin an zinga 25 te hi mipa an ni a, midang 7 chu hmeichhia an ni. Mizoram-a mahni intihlum zingah hian kum 18 - 30 inkar an tam ber a, kum 31 - 45 inkar chuan an dawt a ni. Chhinchhiah danin mahni intihlum zinga upa ber chu kum 87 mi a ni a, a naupang ber chu kum 8 mi a ni bawk.
Kumin-a World Suicide Prevention Day hi National Health Mission (NHM) hnuaia Mental Health Programme bultumin Aizawl-ah hman a ni a, he huna khuallian Gauhati High Court Judge Nelson Sailo chuan mahni intihhlum duhna hluar chho mek hringchhuaktu thil hrang hrangte tarlangin, chung thil zinga langsar ber pakhat chu ruihhlo a nih thu a a sawi a, ruihhlo laka fihlim a pawimawh tih a sawi a. “Mahni intihhlumna lakah hian keimahni kan filhim pawh a ni thei. Mahse, kan bula awm, kan chenpuite emaw, kan thian leh lamhla-a awm pawh nise, an chetzia leh khawsak phungah danglamna a awm em tih kan thlithlai ngun a pawimawh,” tiin hetiang thil kan nunah a thlen loh nan kan rilru sukthlek te a eng zawnga kan herrem a tul thu a sawi bawk.
Mahni intihhlum tum mi beidawngte lo dawngsawng a, an harsatna leh buaina ngaihthlak sak tura Helpline, TeleMANAS chungchang pawh he hunah hian tarlan niin TeleMANAS helpline no 14416 leh 18008914416 hmanga Counsellor leh thawktu dangte englai pawha biak pawh theih an ni. Anni bakah hian ARDSI Mizoram Helpline7005983633 leh 9366191341-ah te pawh biak theih reng a ni bawk.