Kawlphetha mamawh san lai berin MW 181.62

Mizoram in kawlphetha a mamawh san lai berin MW 181.62 a hmang a, hei hi kumin January ni 6 tlai lam dar 5:00 kha a ni.
Assembly thutkhawm neih zawh taka ZPM Member H. Ginzalala zawhna ziaka a chhanna ah P&E Minister F. Rodingliana chuan he thu hi tarlangin, sawrkar kum kal mekah April leh July thla inkar chhunga State pawn atanga Mizoram in power a lei zat chu unit maktaduai 309.272 a ni a. Fur laia Power supply buai thin chhan chu ruah tam avanga leimin in Electric ban leh power line a tihchhiat thin avangte, Mau leh thingte a lo thang chakin, chu chuan line a tih fault thin vang te, Tek in line a denchhiat thin avang te a ni, a ti a. Fur a kawlphetha pek dan a buai chhan hi Power indaihloh vang aiin Transmission leh Distribution Network-ah khaihlak a awm thin vang a nih thu a tarlang a ni.

Fur laia power supply buai thin tih tlem a nih theih nan 132kV Ring Synchronization Projects ruahman a nih thu Power Minister chuan a sawi a. LT Bare Conductor line te hi Cable-a thlak mek a ni a. Fur/ruahsur laia isolator chhia siamthat theih loh thin pumpelh nan Isolator te Inchhung (indoor) a dah tura ruahman a ni bawk. Tun dinhmunah Mizoram in power leina bill ba a nei lo nia sawiin, Rooftop Solar chuan Mizoram-ah kawlphetha a pekchuah tam theih lai bera MW 7.7 pechhuak thei bun a nih tawh thu a tarlang bawk a ni.