July thla aiin August thla ah Ration Card awm zat 13 in a tlem zawk

Food, Civil Supplies & Consumer Affairs (FCSCA) Department chuan Mizoram pumah Ration Card 2,93,995 an pechhuak a, thla hmasa August aiin Ration Card hi 13-in a tlem zawk a ni.
Supply Department-in Mizorama Ration Card awm zat an tarlan danin, August thla khan Mizoram pumah Ration Card 2,94,008 a awm laiin tun thlaah hian 2,93,995 a awm thung a, August thla aia September thla a Ration Card tlemna hi 13 a ni a; hetih rual hian mihring zat erawh August thla aiin September thla-ah mi 16-in an tam thung a ni. August thla khan Ration Card Eng 24,824 awmin September thla-ah pahnih in a pung a, Card Pawl chu 1,54,075 atangin September thla ah pakhat in a kiam thung a. Card Sen hi August thla khan 31,163 a awm a, September thla-ah erawh 59-in a pung a, Card Var chu August thla khan 72,293 awmin, tun thla ah 19-in a kiam a ni.

Ration buhfai lak ngai lo, mahse, thil pawimawh atana Ration Card mamawh si - Not Eligible to Ration (NER) Card chu August thla khan 11,653 a awm laiin tun thla ah erawh 54-in a kiam a. Heti hian Ration Card chi 5 atang hian Card awmna thlak leh siamrem an awm avanga pung leh kiam awm nual mah se, tun thla a Ration Card awm zatin thla hmasa a phak lohna hi 13 a ni ta a ni.

Ration Card-a mihring zat erawh August thla khan 11,74,628 a nih laiin tun thlaah erawh mi 11,74,644 a ni a; mihring zat punna chu 16 a ni. Ration Card chi 5-ah hian Card siamrem a awm nual avangin mihring punna leh kiamna Card a awm a; Card Sen-ah mihring 231 thun belh niin a pun tam berna Card a ni a; Card Var atangin mihring 129 paih niin a kiam tam berna a ni bawk.