Homestay 199 sakna tur tlangzarh a ni
Niminpiah khan Aizawl-a BSI Hall, Bible House-ah Empowering Community Homestays Ceremonial Launch & Capacity Building (Under Bana Kaih, PM-JUGA and CSR Initiatives) Programme hmangin he hunah hian Tourism Minister chuan Mizoram-a Rel lo lut chuan Mizoram-ah rinphak bakin khualzin a tipung tih sawiin, chung khualzin ten kan ram mawi zia, Hospitality leh Civic Sense kan neih that zia Social Media lama an thehdarh te chuan khualzin dang hip zelin tunah chuan Aizawl leh District Capital bakah thingtlang lam pawh khualzin te hian an tlawh duh zel tawh tih a sawi a. Amaherawh chu Thingtlang lamah thlenna tur Hotel te a lo awm si lova, he tah hian Sawrkarin Bana Kaih tlak te puia eizawnna remchang lo siam pui hi a tum ta tih sawiin, Homestays 199 sakna tur a tlangzarh nghal a ni.
Mizoram-a Homestay sak tur 199 atanga 100 sakna tur sum (cheng nuai 540.75) hi Mizoram Flagship programme Bana Kaih atangin hmuh niin MLA Constituency 40 a huam dawn a. Homestay din tura thlante hi Progress Partner tih an ni a, sum hi October thla-ah release tan tur a ni a. Installment hnihin (80:20)-a pekchhuah tur niin Bank Account-ah transfer tur a ni a. Sum dawn kim atanga thla 3 chhungin Homestay hi Operate hman tur a ni bawk.
Homestay 89 sakna tur sum (cheng nuai 500) chu PM-JUGA hnuaia DA-JGUA (Dharti Aaba Janjatiya Gram Utkarsh Abhiyan) Scheme atanga hmuh tur a ni a. Hei hi Tribal Homestay Scheme niin Mizoram-ah Cluster hnih- Central Cluster leh Southern Cluster atan sum hi dawn a ni a. Khaw 12 a huam ang. Homestay siam tura thlan chhuahte hi beneficiary tih an ni. Sum hi October atangin release tan tur a ni. Central guideline angin installment thum (50:40:10) in pekchhuah tur a ni a, Sum dawn kim atanga thla 3 chhungin homestay hi operate hman tur a ni. Homestay dang 10 sakna tur sum cheng nuai 49.96 chu IRFC (Indian Railway Finance Corporation Ltd) te CSR (Corporate Social Responbility) atangin dawn a ni a. Thenzawl leh Serchhip-ah te sak an ni ang.