Fully Literate State hmasa ber tih sawi
Niminpiah Sept. 8, 2026 khan New Delhi a Dr. Ambedkar International Centre (DAIC)-ah International Literacy Day lawmna chu Union Minister of State for Education Jayant Chaudhary-a uapna hnuaiah neih niin he hunah hian Fully Literate-a inpuang tawh State leh UT-a Education Minister-te chu Khual Zahawm tura sawm an nih angin Mizoram Education Minister Dr. Vanlalthlana pawh Khual Zahawm niin a tel a. He hunah hian Education Minister Dr. Vanlalthlana chuan Mizorama ziak leh chhiar thiam an tam theih nana Mizoram Sawrkar hmalakna leh dinhmun tlangpui tarlangin, Mizoram chu India rama Fully Literate State-a inpuang hmasa ber a nih thu sawiin, Periodic Labour Force Survey Annual Report thar ber tarlan danin Mizoram Literacy Rate chu 99.8% a tling tawh tih a sawi a. Ziak leh chhiar thiam tam ber a nihna chu kum 2027 chhiarpuiah chhunzawm zel tumin Mizoram Sawrkar chuan hma a la reng tih a sawi a. Hemi atan hian State sawrkar scheme Rapid Action for Eradication of Residual Illiteracy Project (RAERIP) leh Central scheme ULLAS (Understanding Lifelong Learning for All in Society) kaltlangin hmalak chhoh mek a nih thu a sawi bawk.
India ram State zinga ziak leh chhiar thiam tam ber a nih theih nana Mizoram Sawrkar hmalakna hlawhtlinna tur hian Kohhran, Tlawmngai Pawl hrang hrang bakah Zirtirtute leh Zirlaiten an thawhhlawk hle tih Minister chuan a sawi a. NEP 2020 zulzuiin Critical Life Skills and Occupational Skill Development Programme hnuaiah thiamna chi hrang hrang zirtir thin a nih thu sawiin, kum 2026 thlengin training chhuak mi 634 an awm tawh tih a sawi bawk.
Minister hi SCERT Director Carolyn Zoramthangi, School Education Joint Director NG. Fanchun, Samagra Shiksha State Project Director C. Lalthanzira leh State Centre for Literacy Nodal Officer Lianhlupuii ten an tawiawm a ni.