Fisheries Department hmalakna thlirletin Mizoram-ah Sangha tharchhuah a pung nia tarlan a ni
Chief Minister Lalduhoma hova Fisheries Department hmalakna thlirletna hunah hin Chief Minister Lalduhoma chuan Review Meeting chu thil dik lo zawngchhuak tura ko a ni lo tih sawiin, “Hmasawnna nasa zawk kan neih theih nana a taka thawktute nena inkawmhona a ni a. Chuvang chuan inpawh takin thil kan sawi ang a, hlawk taka hun hman kan tum dawn nia,” a ti a. Fisheries Minister Lalthansang pawhin Fisheries Department hmasawnna tur leh hmachhawp te, harsatna an tawh mekte Chief Minister-in inhawng taka a sawipui chu an lawm hle tih sawiin, “Hma kan sawnpui ngeiin ka ring a ni,” a ti a. Hemi hnu hian Fisheries Department hmalakna leh hmachhawpte sawihona an nei zui a ni.
He huna tarlan a nih danin Mizoram hian Lui (water body) Hectare 6000-a zau, Lui lian 16 telin a nei mek a. Tuikhuah lian Hectare 8000 a nei mek (Serlui leh Tuirial HEP) a. Natural Lake pahnih Tam Dil leh Palak Dil neiin Hectare 5-a zau a nei bawk a. Sangha vulhna tur hmun hi a nei tha tawk a ngaih niin a vaiin Sangha vulh theihna hi Hectare 24000 vel a awm nia ngaih a ni a. Chung zinga 26.3% chauh chu tunah hian hman tangkai a la ni a. Hetiang hi Mizoram dinhmun (data) nia hriat ni mah se Sangha vulh theihna a neih zat dinhmun (data) dik tak hi neih that dan dap tha an ti a. Hmun 95-ah YMA nena tangrualin Lui humhalhna kalpui mek a ni a, YMA nena inremna hi kum hnih (2) danah siam thar zel a ni.
Mizoram Sangha tharchhuah zat hi kum 2020-21 ah MT 4304.69 nia chhinchhiah niin kum 2025-26 ah chuan MT 8020 nia chhinchhiah niin Mizoram mamawh za zela 58.28 (58.28%) kan tharchhuak tawh nia ngaih a ni a. Tunah hian Avarage Productivity per Hectares chu MT 1.21 a ni a. Dil hi siam belh tawh lovin hectares khat atanga tharchhuah zat tihpun hmang mai pawhin nasa taka hmasawn thei kan ni tih tarlan a ni a. Sangha chi siam thei (Hatchery) hi Mizoram-ah 14 awm mek nia sawi a ni a, anniho zing atang hian Empanelled Supplier pawh register an ni.
Sangha vulhtu pawh kum 2020-21 ah mi 16,486 niin kum 2025-26 ah mi 22,661-ah an pung a, Hectare khat atanga tharchhuah theih zat (Productivity per Hectares) pawh kum 2020-21 a Metric Ton 0.78/ Ha/year chu kum 2025-26 ah chuan Metric ton 1.21/Ha/Year ah a sang chho tih tarlan a ni a. Amaherawh chu he productivity rate hi a la tihsan theih hle nia ngaih a ni bawk.
Sangha khawitute hi anmahni sum seng miah lovin kumin atang khan PMMSY hnuaiah Group Accident Insurance Scheme kalpuisak tan an nih thu pawh he hunah hian tarlan niin Mizo-ram-a Sangha khawitu mi 4302 te chu insured tawh an ni a, Serlui ‘B’ tuikhuah leh Tuirial tuikhuah te chu PMMSY 2.0 hmanga Integrated Development kalpui tura ruahmanna siam a ni.
Lengpui-ah Fish Farmer Training sak mek niin PMMSY 2.0 hmanga Fish Marketing Centre sakna tur chu Central sawrkar chuan a thuphungin cheng vbc. 50 a rawn phal tawh a, Zawlnuam-ah Integrated Aqua Park siamna tur project duan a ni bawk a. Ngaizel-ah Cold Storage sak niin nikum November thla khan hawn tawh a ni a. Electric Supply tha zawk pek tuma hmalak mek a ni.
High Level Task Force on Sustainable Aquaculture & Livelihood chuan Mizoram chu kum 2030-a Sangha MT 20,000 tharchhuak turin a beisei a. He target tihlawh-tlinnna atan hian PMMSY 2.0 bakah a hranpa taka duan Chief Minister Blue Mizoram Mission kalpui thaa ngaih a ni a. Department pawhin CM Blue Mizoram Mission project tur hi an duang tan tawh bawk a ni.