Electric Smart Meter chungchanga hmalakna leh harsatna thlirho
Nimin khan P&E Minister F. Rodingliana hovin a Pisa-ah RDSS Scheme hnuaia Smart Meter vuah mek chungchang hmalakna leh harsatna te Department Official te nen sawiho a ni a, he hunah hian Smart Meter hman ngei ngei a ngaih chhante tarlan niin, India ramah Electric kal ral (loss) tam tham tak tihhniamna turin Ministry of Power chuan RDSS: Loss Reduction Scheme a duang chhuak a, he Scheme hnuaiah hian Smart Meter vuah runpui chu ram pumah neih a ni ta tih tarlan a ni a. Central Electricity Authority (CEA) (Installation and Operation of Meters) Regulation 2026 chuan communication network (internet signal) awmna tawh phawtah chuan Smart Meter hmang chauhin Electric supply pek tur a ti a, amaherawhchu, Pre-payment (prepaid) Smart Meter erawh electric hmangtute duhthlannaah dah a ni.
Nimin-a thutkhawm ah hian Smart Meter vuah a pawimawhzia sawiho niin, Mizoram-ah hian electric consumer 3,20,000 vel an awm a, chung zinga 34,300 vel chu meter chhia (reading kal lo) a ni a. Heng bakah hian meter engemaw zat chu electric hman dan teh dik tawk loh a awm ngei tih hriat a ni bawk. Hengte avang hian Mizoram chhungah electric kal ral (power loss) tam tak a awm phah a, he loss tihniam tur hian Central Sawrkar hmalakna zarah Smart meter vuah hna chu Mizoram-ah pawh thawh a ni ve ta a ni.
Tun dinhmunah Smart Meter 82,000 vel vuah tawh a ni a, Smart Meter vuah tawhte zingah vuah thar tirh a bill tam deuh 24.67% vel an awm a. Nimahsela, a hnuah a tam chhunzawm chuang lo a; chutihrualin, bill tlem zawk pawh 30.24% lai an awm ve bawk tih tarlan a ni.
Mizoram-a hman tur Smart Meter reng reng hi phurhchhuah a nih hmain Laboratory-ah a dik ngei a ni tih finfiah vek a nih thu leh finfiahna (testing) ah hian Mizoram aiawhin P&E Department Engineer-te an tel ziah tih tarlan a ni a. Heng bakah hian Laboratory-a test paltlang tawh te zinga engemaw zat (duh duh thlangin) chu a dik zia finfiah nan National Accreditation Board for Testing and Calibration Laboratory-ah enfiah leh thlap a ni a, heng finfiahna zawng zawng paltlang hnuah chauh Mizoram-ah phurh chhuah thin a nih thu leh vuah hnuah meter chu a lo dik tawk lo emaw, manufacturing defect engemaw a awm a nih chuan meter number atangin Laboratory-a test dan kimchang chhui let leh vek theih a nih thu tarlan a ni bawk.
Meter dik tawk lo te chu Smart Meter a thlak a nih hnu hian Electric hman zat dik tak hriat theih ni tawhin, mi thenkhat Bill a tam chhan pawh nia a lan thu tarlan a ni a. Billing period tihsual palh te, meter thlak laia Manual Reading lak sual palh te, Sim Card communication fel lo vanga Bill a huna chhuak lo te leh thildang tam tak avangin Bill tam emaw, harsatna engemaw a awm theih thu tarlan a ni a. Hetiang avanga harsatna tawkte puihna tur leh complaint thehluhna tur Customer Care Centre (CCC) te nasa zawka puangzar tura tih niin, Electric Bill chungchanga harsatna neite chuan Telephone number 0389-2310169/2322174, Whatsapp No. 8132801559/6009192434 emaw, mahni bialtu Electric Department Office-ah harsatna te thlen theih reng a ni tih an tarlang a, P&E Department chu mipui harsatna chingfel turin a inpeih reng tih an sawi bawk a. Hei bakah hian Eelectric bill complaint a luhin a dik leh dik loh finfiah hmasa lova bill pe hmasa tura lo nawrluitu Electric Duty an awm thin anga sawi a awm thu pawh sawichhuah niin, hetiang ang harsatna tawk an awm chuan Department hotute hnenah hriattir turin an ngen a ni.