Dinhmun sang-a School dah lawmna hun hman a ni
Mizoram sawrkar chuan Govt. Kawnpui Higher Secondary School leh Govt. Green Hill High School, Kawnpui te chu Provincialised dinhmun ah dahin Lalfak Memorial High School chu Lumpsum Special Category S2 dinhmun ah a dah bawk a, heng zirna In dinhmun sang zawka dah te lawmna hun Kawnpui Chhim Veng YMA Hall a neih ah hian Education Minister chuan Zirna In te chawisan a ni chu khawtlangin theihtawp an chhuah vang a ni tih sawiin, Zirtirtute pawh khawtlang zai ngai thiam a, khawtlang tana theih-tawp chhuah ve zel turin a chah a. Adhoc atanga provincialise a nih avanga duhtawk lova, result tha zawk nei tura tan la thar leh turin a fuih bawk.
He hun hi Bialtu MLA K. Laldawngliana chuan Khual zahawm nia hmanpuiin a Bial chhunga School pathumte hlankai an ni chu lawmawm a tih thu sawiin, lawmpuina Rs. 25,000/- theuh leh Football a hlan a. Zirna chu ram hmasawnna kailawn pawimawh ber a nih angin tha taka lehkha zir a hmasawn turin zirlaite a chah a. South Tuipui Bialtu MLA, Jeje Lalpekhlua pawhin he hun hi Khual Zahawm nia hmanpui bawkin Sawrkarin theihtawp chhuaha School te a hlangkai chu a lawmpui rualin, Education Minister chak tak kan nei chu lawmawm a tih thu a sawi a. Zirtirtu leh zirlaite chu inkungkaihna tha tak nena hma sawn zel turin a fuih bawk.
Nimin-a he hun hman ah hian Kawnpui SDO (Civil) Dr. Doris Lalrinawmi leh Kolasib DEO K. Lalsiamliani te pawhin thu sawiin, Lok Sabha MP Richard Vanlalhmangaiha pawhin School pathumte hlankaina lawmpui nan hian Rs. 2,50,000/- theuh a pe tih tarlan a ni bawk.