Deputy Speaker in kawng chungchang Larsap a sawipui

Mizoram Legislative Assembly Deputy Speaker leh Kolasib Bialtu MLA Lalfamkima chuan nimin khan Mizoram Larsap General (Dr) Vijay Kumar Singh chu Lok Bhavan-ah hmuin Vairengte atanga Sihmui panna kawng siamthat chungchang leh Kawnpui atanga Aizawl panna kawng zauh chungchang a sawipui.
Deputy Speaker hian Vairengte leh Sihmui inkar kawng chhe zual lai, tui putin a tihchhiat thinte siam that nan PQC (cement a chhun) hmang tura NHIDCL in 'Change of Scope' an siam, Delhi lamin 'in-principle' a an lo pawm tawh chu Governor hi sanction nawrpui turin a ngen a. He kawng-a tui put thin siamthatna tur PQC hman rawtna NHIDCL in central-a an thehluh chu a taka hna thawh theih nan sanction hmuh a ngai a, Fur ruahtui a ban ruala Working Season intan hunah hna tan nghal a nih theih nan sanction hi nawr chhuahsak turin Deputy Speaker hian Governor hi a sawipui a. Governor hian he ngenna hi lo ngai pawimawhin, karleh-a Delhi a kal hunah theihtawpin hma a lo lakpui tur thu a lo hrilh a ni.

Hei bakah hian Deputy Speaker hian Kawnpui atanga Durtlang kaltlanga Aizawl panna kawng (Tang kawng) pawh chu double lane-a siam a nih theih nan Central hotute hnena nawrpui turin Governor hi a ngen nghal bawk a. Governor pawhin Aizawl khawpui luhna leh chhuahna hi kawng pakhat chauh rinchhan lova, kawng pahnih tal a awm theih chu a duhthu a lo sawi ve bawk a. He kawng double lane a siam tura ngenna hi a ngaihpawimawh thu leh theih tawpa a lo bawhzui tur thu a sawi bawk a ni.