DC hovin Four lane sawiho

Nimin khan Kolasib-ah District Bawrhsap H. Dolianbuaia hovin Kolasib District chhunga 4-Lane NH-306 & 06 siam hna thawh mek leh a kaihhnawih harsatna hrang hrangte chinfel dan tur sawiho a ni a, Bawrhsap chuan Package 7 huamchhunga ram neitu thahnem takin zangna-dawmna (compensation) an la dawng lo chu pawi a tih thu sawiin, “Heng zangnadawmna la dawng lo te hi mi harsa tak tak, an ram leh hmunhmate eizawnna leh intunnun nana hmang an ni hlawm a. Chuvangin, zangnadawmnate hi a hma thei ang bera an lak theih nan NHIDCL-te hian theihtawp in chhuah a ngai a ni,” a ti. He thutkhawmah hian NHIDCL Official-te leh ram neituten an din Joint Action Committee aiawhte atangin an dinhmun ngaihthlak a ni a, Competent Authority for Land Acquisition (CALA) leh Addl. DC ni bawk B. Malsawmtluangi pawhin, ram neituten an chanvo dik tak an neih ngei theih nan tun aia nasa zawka hma la turin NHIDCL hotute a chah bawk.