Bana Kaih Scheme Phase-II a dilna lut thlirho; Sept. 18 atangin Phase-III kalpui leh tum

Mizoram State Policy Coordination Committee (MSPCC) chu nimin khan thukhawmin Bana Kaih Scheme Phase-II kalpui mek hnuaia Chief Minister Special Package dilna 910 leh Bana Kaih Scheme Loan Component dilna 106 te an endik a. September ni 18 atang hian Bana Kaih Scheme Phase-III kalpui tan leh turin inbuatsaihna kalpui mek a ni bawk.
Nimin-a thutkhawm Planning & Programme Implementation Committee Room-a neih hi MSPCC Vice Chairman leh Adviser to Chief Minister Dr. KC Lalmalsawmzauva chuan kaihruaiin Bana Kaih Scheme hnuaia tanpuina chu a thlawn a sem a ni lo tih a sawi a. Hemi avang hian a dawngtu tur thlanchhuahna kawngah pawh Implementing Department-a Nodal Officer-ten mi rintlak, hmasawn tum tlat, taima leh thiamna hmantlak neite thlanchhuah an nih ngei theih nan dilna lutte thlitfim kawngah uluk leh fimkhur taka kalpui a pawimawh thu a sawi bawk. Bana Kaih Scheme Phase I leh II kalpui chhung hian Sawrkar hnuaia Implementing Department leh Partner Bank hrang hrangte thahnemngaihna leh inpekna avangin Mizoram khaw hrang hrangah chhungkaw ttahnem takin eizawnna ngelnghet an neih phah mek thu a sawi bawk a. Mipui rawngbawl tura Bana Kaih Scheme tih hlawhtlin nana thawktu pawimawh tak an ni tih hre reng turin Implementing Department atanga Nodal Officer leh Bank hotu kalkhawmte chu a chah a ni.

He thutkhawm ah hian Chief Minister Special Package dilna lut 910 te thlirin, heng te hi AH & Vety Department atangin 496, Horticulture Department atangin 185, Commerce & Industries Department atangin 119, Land Resources, Soil & Water Conservation Department atangin 69, Fisheries atangin 19, ICT atangin 6, Agriculture & Farmer's Welfare Department atangin 5, I&PR Department atangin 2 leh Tourism Department atangin dilna pakhat te a ni a. Loan Component dilna 106 lutte hi Nodal Officer-ten a mal te te-a sawifiahin MSPCC member-te nen uluk takin zirchian a ni a, siamthat ngai, thlak danglam ngai leh paih ngaite endik a ni bawk.