ASF vanga Vawk thi la awm; Khuahkhirhna siam zui zel a ni
Serchhip a AH &Vety Department ten an chhinchhiahna atanga a lan danin nimin thleng khan Serchhip District-ah hian ASF vanga Vawk thi chhinchhiah ala awm zel a, nimin khan Chhuanthar Tlangnuam ah ASF vanga Vawk thi pakhat awm lehin hemi nen hian kumin chhungin Serchhip District-ah ASF vanga Vawk thi 1903 a awm tawh a, hri leng darh zel tur danna atan Vawk 1089 suat a ni tawh bawk a, kumin-a Serchhip District-a ASF vanga Vawk thi leh suat hi a vaiin 2992 an tling tawh a, khua leh Veng 21-ah ASF hri hi hmuh ni tawhin chhungkaw 702 in an tuar tawh a ni.
Hetihlai hian Serchhip District Addl. District Magistrate Dorothy Muansangi chuan nimin khan thupek tichhuakin Serchhip District-a Vawk, Vawksa leh Vawksa atanga siam lakluh khap a nih thu a tarlang a. Thupek a tihchhuah ah hian Serchhip District chhung khaw thenkhat ah ASF vanga Vawk thi leh Vawk damlo hmuh mek zel ala nih thu tarlangin, hei vang hian Section 163 of BNSS 2023 tlawhchhanin Serchhip District chhungah ramdang (Foreign Countries), State dang leh District dang atangin Vawk, Vawksa leh Vawksa atanga siam thil reng reng lakluh leh thawnchhuah khap a nih thu a tarlang a ni.
Hei bakah hian Serchhip District-a khua leh khua te pawh Vawk inlakpawlh khap tlat a nih thu tarlangin, Vawk damlo reng reng talh leh hralh khap a nih thu te; Vawk damlo chu dah hran vat tur a nih thu leh Vawk damlo leh thi reng reng chu AH&Vety Department-a thawktute hnenah hriattir vat tur a nih thu bakah Vawk thi reng reng uluk takin Disinfectant nen thuk taka phumbo tur a nih thu a tarlang a. Thupek zawm lo chu Section 223 of BNS 2023 dan hmanga hrem theih an nih tur thu a tarlang bawk a ni.