ZPM President-ah Chief Minister nilai puan a ni

“Tuna kan kalphung thar tur hi kan enchhin dawn” - Lalduhoma

Zoram People's Movement (ZPM) Party chuan an President atan Chief Minister nilai Lalduhoma chu an puang ta a, ZPM President thar tur Lalduhoma chuan “Tuna kan kalphung thar tur hi kan enchhin dawn a, a that loh chuan a tha zawk hmangin kan kal leh mai dawn a ni,” a ti.

ZPM Party hian nimin khan Aizawl-a an party Office-ah Chhung Inkhawm neiin Val Upa Council (VUC) Secretary Prof. Thangchungnunga chuan September 15-a Val Upa Council (VUC) Meeting-a an rel anga ZPM Party hruaitu (Elected Office Bearers) thar turte a puang a, President-ah Chief Minister nilai Lalduhoma chu ruatin Sr. Vice President-ah State Planning Board Vice Chairman nilai Dr. Kenneth Chawngliana; Vice President-ah Lalmuanpuia Punte MLA leh Treasurer-ah T. Lalhlimpuia MLA te an nih thu a puang a. VUC Member Rev. Darchungnunga chuan hruaitu thar te tawngtai sakin VUC Member bawk Maj. Thanruma chuan fuihna thu a sawi a, VUC-in uluk taka ngaihtuahna an sen hnuah Party hruaitu thar an ruat thu sawiin, “Rorel lai party tana tha tur ngaihtuah chung leh ram pum huap thil ngaihtuah chungin hruaitu thar kan ruat,” a ti a. “Ram hruaitute hi Pathian hriakthih an nih avangin a pawng a pui-a do ngawt chi an ni lova, theihtawpa puih tur zawk an ni,” tiin Hruaitu nihna chu hmansual tur a nih loh thu leh chapopui chi a ni hek lo tih sawiin, “A hunah Pathian a che mai thin,” a ti bawk.

ZPM hruaitu thar puan a nih hnu hian President tura ruat Lalduhoma chuan thu sawiin,“Pathian kaihhruaina a zarah ZPM-in kum 10 kan lo tling ve ta reng mai a, Vawiin min thlenpuitu leh sawrkarna hial min thlenpuitu chu kan hruaitu kalta te an ni. ZPM a awm chhung chuan kan hre reng tawh ang,” a ti a. Hruaitu thar ruat chungchangah Pathian an rawn nasat thu leh mi tam takin an tawngtaipui tih pawh sawiin, “Vawiin-a hruaitu thar ruatte hi VUC kaltlanga kan tawngtai chhanna ah kan ngai a ni,” a ti.

ZPM chu Mizoram-a party awm zingah VUC nei awmchhun an ni tih Lalduhoma chuan sawiin, “A pawimawh hunah an rawn lang thin a, tun dinhmunah pawh an pawimawh leh tangkai zia kan hria a, kan chhawr tangkai hle a ni,” a ti a. “Chief Minister ruattu an ni a, inthlan hma fe atang tawhin Chief Minister tur an ruat lawk vek a, inthlan fel tawh hnuah Chief Minister tur ruat ni chauh se House Leader tur inchuhna leh thil dangah harsatna thleng thei a ni a, hetiang buaina awm thei hi ZPM chuan kan nei ve lo a ni,” a ti bawk.

Lalduhoma chuan hun inher mil zelin ZPM pawh an inthlak danglam chho tih sawiin, “Chief Minister leh Party President chelh kawp tha kan ti lova, hun engemaw chen kan kalpui hman. Tunah erawh kan thatna tur zawk nia hriain Party thuneitu sang kalkhawm chuan Chief Minister leh Party President nihna chelh kawp chu tha zawk dawnin a hre leh ta a ni. Tuna kan kalphung thar tur hi kan enchhin dawn a, a that loh chuan a tha zawk hmangin kan kal leh mai dawn a ni,” a ti bawk. 

ZPM President thar tura puan chuan Pu chuam neih te, hotute tlawna tlaktlum tum thin te, intihtheih ching te, ram leh party ni lo mahni tana Chakai khawrh thin te chu ZPM party-ah chuan dinhmun sang chelh tur atan an duh lo tih pawh sawiin, “Party inlungrual tak kan nih chhung chuan pawn lam miten min tichhe thei ngai lovang,” a ti bawk.