Agriculture Department leh MULCO ten chak zawka NMNF kalpui turin thawhdunna an ziak
National Mission on Natural Farming (NMNF) atana Agriculture Department leh Mizoram Milk Producers' Cooperative Union Limited (MULCO Ltd.) te thawhdunna thuthlung hi Agriculture & Farmers’ Welfare Department changtu Minister, PC. Vanlalruata hovin Aizawl Tuikual a A&FW Conference Hall-ah ziah niin Agriculture & Farmers’ Welfare Department Secretary, Ramdinliani chuan a kaihruai a, Agriculture Department aiawhin Director, Vanramthangi chuan a hming ziakin MULCO aiawhin Managing Director, Ramesh Kumar chuan a hming a ziak bawk a ni.
Thawhdunna Thuthlung ziahnaah hian Agriculture & Farmers Welfare Department changtu Minister PC. Vanlalruata chuan Mizoram-a kuthnathawktu, a bik takin ranvulha eizawngte tana hmasawnna tur rahbi thar a kai leh ta chu lawmawm a tih thu a sawi a. Agriculture Department leh MULCO-te thawhdunna chu Mizoram tan thil chhinchhiah tlak tak leh ran, a bik takin Bawngvulhtute tana hmasawnna ropui tak thlentu a nih ngei a beisei tih sawiin, Sawrkar chuan kuthnathawktute dinhmun chawikan nan theihtawp a chhuah zel dawn tih a sawi bawk a. He thawhdunna hnuaiah hian Ran zun leh ek atanga leitha leh rannung thahna hlote siamchhuah a nih a, chung chu loneitu ten an hman tangkai hunah chuan mipui vantlang hriselna pawhin hma a sawn ngei dawn tih a sawi bawk.
Agriculture & Farmers’ Welfare Department chuan National Mission on Natural Farming (NMNF) Scheme hmang hian kum 2025 atang khan hma a lo la tan tawh a. Tunah hian District tinah he Mission hi kalpui niin Cluster 304 zet din a ni tawh a, heng Cluster-teenkawltu tur hian Community Resource Person (CRP) 608 ruat an ni tawhin, Bio Resource Centre (BRC) pawh 72 din tawh a ni bawk a ni.
MOU ziah tak hi National Mission on Natural Farming Guidelines anga kalpui tur a ni a. Guidelines ang chuan Bio-input Resource Centre (BRC)-te hian Bawng ek leh Bawng zun hmanga siam leitha (Organic Fertilizers) leh rannung thahna (bio-pesticides)-te siam chhuakin loneitute hnenah an hralhchhuak thin anga, heng Inputs hi Natural Farming hnuaia loneitu in register te chuan hmang ngei tura beisei an ni. BRC-ten hnianghnar taka heng bio-inputs hrang hrang an siamchhuah reng theih nan leh MULCO hnuaia Bawngvulhtu ten sum an lakluh belh theih nan MULCO Ltd. huangchhunga Bawngvulhtu te chuan Bawng Zunte hi BRC-te hnenah an hralh thin dawn a ni.