Zu siamna bel leh Heroin man sa halral a ni
Heng an halral te hi Zu siamna atana hman Bel sawm (10) leh Heroin Tictac bur 6 niin New Serchhip Presbyterian Kohhran School ramah New Serchhip Ruihhlo Do Committee Chairman Upa R. Sanghming-thanga chuan a halral a, Zu leh damdawi-te hi kan ramina nasa taka kan do leh a tirem tura kan inpek a tul thu sawiin, ruihhlo zuartute pawh an thil tih that lohzia hria a, Kohhran, ram leh khawtlang duh loh a ni tih hria a, sim duhna thinlung nei se a duh thu a sawi a, ruihhlo zuartute chu an huat loh thu leh hmangaih tak chungin kawng dik zawh turin an sawm tih a sawi bawk.
He hunah hian New Serchhip Ruihhlo Do Committee Secretary, PC. Lawmsangzuala chuan an hmalakna tlangpui tarlangin, New Serchhip Ruihhlo Do Committee hi kum 2023-ah New Serchhip Pastor Bial Inkhawmpui thurel bawhzuina a Kohhran leh tlawmngai pawl hrang hrang te thawhpuiah sawm chunga an din a ni a, NSRDC hnuaiah hian Anti-Drug Squad din leh niin anni hi tum 45 fehchhuak tawhin ruihhlo leh a siamna hmanrua engemaw zat an man tawh a, ruihhlo an man tawhte hi Heroin No. 4 Hawng 34 leh Can 5 leh Tictac 12, Rakzu litre 1200, Zu bilhlai litre 2400 leh Ganja gram 65 te a ni.
Hei bakah hian NSRDC hian naupang leh tleirawl ten ruihhlo an tih ve lohna tura inzirtirna pawh kalpuiin, mithiam zawkte sawmin an huam-chhunga ni tin School leh Sunday School naupangte hnenah ruihhlo that lohzia inzirtirna (Awareness campaign) an kalpui thin a ni. New Serchhip Ruihhlo Do Committee-ah hian Kohhran hrang hrang 12, YMA Branch 6, Village Council 3, MHIP Branch 6 leh MUP Branch 3 te telin Pastor Bial huapa hmalakna kalpui tura din a nih angin Serchhip Town chhung bakah Vanchengte huamin hmalakna kalpui a ni bawk.