ZPM-in ‘Tawlhlohpuan’ lo hlan
ZPM Media & Publicity Department hian Chief Minister zin haw hi Mizoram Legislative Assembly House Recess Room-ah an Chairman B. Lalchhanzova hova lo hmuin, “Kan Chief Minister hi Vawiin-ah a lo haw dawn avangin MNF unauten CM Bangla Gate bulah Pawndum nen an lo nghâk a, keini pawhin Tawlhlohpuan hlan kan tumin kan ngaichâng bawk,” tiin Programme ruahman sa a lo awm avangin an pan chilh ta tih a sawi a. “August ni 6-ah kan Chief Minister Pu Lalduhoma, Council of Churches in Mizoram, (CCM) General Secretary Rev. Lalhmangaiha leh Mizo-ram Kohhran Hruaitute Committee (MKHC) Secretary Rev. Lallawmthanga te New Delhi kalin, Parliament House-ah Union Home Minister Pu Amit Shah an hmu a. FCRA Mizoram tân a him tawk lohna te thlenin 'Memorandum' an thehlut a ni. Hemi avang hian Pu Amit Shah hian an thil thlena pawimawh tak 'Retrospective' FCRA awm hma leh a bawra 'registration' te an tih tel loh thu te sawiin, karleh-a Parliament thutkhawm neih hmain an thu thlen dangte a lo zirchiang dawn tih a sawi a, kan lawm em em a ni,” tiin Kristian te hlauhthawn FCRA chungchanga Chief Minister te hmalakna chu fak a phu hle tih a sawi.
FCRA chungchanga Chief Minister leh ZPM party hmalakna sawiin B. Lalchhanzova chuan, “Kar hmasa lama Kawrthah North V/C programme-ah CM chuan ‘Kristian mipuite tâna him lovah chuan kan dodal zel dawn’ a tih thu a sawi. ZPM PAC Extended Committee chuan FCRA chungchang kan ngaihtuah tawh a. Kan duhdana thil kan tih chu kan MP pahnihten nghet takin kan vuan ang a, kan dinna a nih loh chuan FCRA hi Parliament House-ah kan 'pass' pui lo mai ang,” a ti bawk.