Serchhip-a leivung paihna tur hmun zirchian a ni dawn
Serchhip khawpui chhunga leivung paihna (Spoil Bank) chungchanga harsatna awm mekte sutkian dan tur ngaihtuahin Zirtawpni khan Serchhip Bawrhsap Paul L. Khuma hovin Serchhip DC Meeting Hall-ah sawrkar mi pawi-mawh te leh khawtlang hruaitute an thukhawm a, he thutkhawm ah hian tun dinhmuna Serchhip Town Area-a leivung paihna awmchhun, Serchhip Truck Owners Association te enkawl, By-pass road Lei (bridge) bula mi chuan daltu awm lova Darnam lui a pawh thu leh DC Office-a thawkte leh YMA hruaituten endikna an lo neih tawhna atangin hman reng chi nia an hriat loh thu tarlan a ni a. Hetiang a nih avang hian uluk leh mumal zawka Spoil Bank awm theihna tur tha zawkte zirchianga hma la zui turin 'Survey Team' chu din nghal a ni a, Team Leader atan DRDO Project Director Dr. Malsawmtluanga Fanchun chu ruat a ni bawk.
Survey Team-te hian August 14, 2026 hmain leivung paihna tur hmun thar tha zawkte thlithlaiin, Loneitute leh kan chhehvel (environment) tana nghawng tha lo nei lo tur hmunte an zawng dawn a. He thutkhawm ah hian Sailiam leh Keitum inkarah chuan nghawng tha lo (environmental impact) thlen theihna a san avangin Spoil Bank hi siam loh nise tiin rel a ni bawk a. Hei bakah hian Chhiahtlang-a Spoil Bank vanga leilet chhiate chu Contractor (Package 2), KRAM Infracon Pvt. Ltd. ten a tihfai hna thawk tura tih niin Zawlpui FMC leh Lumtui FMC atanga an huamchhung Zau-a Spoil Bank in chhiatna a thlen tarlan te pawh Contractor ten siam that/thenfai hna Fur zawh veleh ah an tan ang tia rel a ni bawk.
He thutkhawm ah hian DC Office, Revenue Department, PWD, Mizoram Pollution Control Board (MPCB), NHIDCL, Authority Engineer leh KRAM Infracon Pvt. Ltd. aiawhte bakah FMC leh VC aiawhte pawh an tel a ni.