ZMC&H-ah a vawikhatna atan Lung Zai (Open-Heart Surgery) hlawhtling takin nei
Lung zai thiam Cardiothoracic Surgeon Dr Mary Hmingthantluangi leh phai lam atanga Doctor thiam lo kal, Dr. Intekhab Alam, Cardiothoracic Surgeon, Apollo Excel Hospital, Guwahati ten hlawhtling takin damlo kum 69 mi hi an zai a. Damlo hian thla 6 kalta khan Heart Attack neiin Lung natna ah chuan zai hautak ber chi, Triple Vessel Disease natna a vei a; darkar 6 leh a chanve chhung zet an zai a. Doctor-te hian thisen zam pawimawh pathum block te an siam that chhungin, damlo lungphu an titawp lailawk a. Lung hnathawh hi khawl (Heart-Lung machine) hmanga chhawk niin, Thisen-zam siam that a nih hnuah Lung hi an tinung leh a. Lung-a thisen zam chhia te siam that nan hian damlo ke-a thisen zam (saphenous vein) leh damlo awm (chest)-a thisen zam (LIMA) te an hmang a ni.
He Inzaina hautak takah hian ZMC&H Anaesthesiology Team ten khawl changkang leh tha tak tak hmangin damlo hi an vil reng a. Cardiologist Dr. Lalthafala pawhin uluk takin zai chhung zawng hian a vil bawk a. Damlo hi zai zawh a nih hnuah ICU-ah enkawl chhunzawm turin dahluh niin damlo chhungte pawh a zaitu Surgeon, Anaesthesiology Team leh OT team te chungah an lawm hle a ni. Phai atanga Cardiothoracic Surgeon lo kal pawh hian tun tuma Open Heart surgery atana Surgery Team, Anaesthesiology Team leh Nursing leh mi dangte inbuatsaihna chu tha a tiin a fak hle. Damdawi In lam hotute pawhin Lung zai hi an ngaihven a, ngun takin an vil reng a ni.
Health Minister Lalrinpuii chuan Social Media kaltlanga thuchhuah siamin, ZMC&H-ah a vawi khatna atan hlawhtling takin Lung zai a ni ve tak thu hi tarlangin, Open Heart Surgery hlawhtling taka neih a nih theih nana thawktu - Surgeons te, Anaesthesiology Team te, Cardiologist, Dr. Lalthafala te leh OT nurses leh thawktu dang zawng zawngte inpekna a fak thu a sawi bawk.
Zoram Medical College and Hospital, Falkawn-ah hian kumin February 14 khan Mizoram-a a hmasa ber ni turin Pancreas Cancer chu Verh (Laparoscopy) in zai a lo ni tawh bawk a, Endoscopic Ultrasound (EUS) chu Mizoram-ah a vawi khatna atan kalpui a lo ni tawh bawk a ni.