Serchhip District-ah TB vei mi 56 an awm mek
Nimin khan Serchhip DC Meeting Hall-ah District Level TB Mukh Bharat Abhiyan leh TB Forum thutkhawm chu an Chairman leh Bawrhsap, Paul L. Khuma hovin neih a ni a, he hunah hian Deputy Chief Medical Officer (CMO) Dr. Lallawmkimi Chhakchhuak chuan District Level TB Mukh Bharat Abhiyan thiltum tlangpui sawiin, December 2026-a India rama TB natna umbo tumna kawnga rampum huap hmalakna a nih thu a sawi a, Dsitrict chhunga hmalakna report ngaihthlak niin Serchhip Disitirct chhunga TB natna tihrem dan tura ruahmanna hrang hrangte sawiho a ni bawk. Report-a tarlan a nih danin India ram mipui 40% te hian TB hrik kai anga chhut niin kumtin mi nuai 31 vel chu TB avangin an thi thin a, Mizoram-ah TB natna vei 1371 awmin Serchhip District-ah chuan mi 56 an awm a, Thenzawl-ah vei an tam ber a ni.
He thutkhawmah hian Block leh District Level-ah TB Mukh Bharat Abhiyan Committee din a ni tawh thu sawilan niin, VC Area hrang hrangah TB Screening chak zawka kalpui a nih dan tur te, TB Free Village nih theih dan tur te, Health Department leh sawrkar Department hrang hrangte leh khawtlang hruaitute inkara thawhhona tha zawk a awm theih dan turte, ruahmanna te chak zawka bawhzui dan turte rel a ni a; TB Forum kaltlanga TB natna veite tana tanpuina pek dan leh tanpuitu, Nikshay Mitra nih theih dante sawi a ni bawk a, kum 2025 khan Serchhip District-ah TB Free Village 23 an awm a ni.