Mualthuam North-a thihna thu ah inpuang

Tun thla tir lama Mualthuam North khuaa H. Lalramdinpuii thihna chungchangah mi pahnih te chu nimin khan SIT hmaah an inpuang ta.

Nimin-a Mizoram Police ten thuchhuah siama an tarlan danin H. Lalramdinpuii thihna chungchang hi Lunglei Police Special Investigation Team (SIT) ten uluk taka chhuiin mi hrang hrang an koh hnuah Mualthuam North-a cheng Denghmingthanga (20) leh Lalneihkima (34) te chu vawi tam tak thu zawhfiah tura koh an nih hnuah leh Police ten an phone hman dan (digital evidence) leh Forensic evidence an kalpui atanga rinhlelhna awmte chu chik chho zelin chung finfiahna te leh zawhna chi hrang hrang an hmachhawn hnuah nimin, August 20, 2026 khan hemi te pahnih hi Lunglei Police SIT te hmaah an inpuang ta tih an sawi a, nimin vek khan manin Judicial Custody-ah dah nghal an ni.

H. Lalramdinpuii thah a nih chungchanga thil thlen dan kimchang leh finfiahna (evidence) hrang hrangte erawh tun dinhmunah dan kenkawhte leh he thubuai chhui zelna tibuai thei tur a nih avangin la tarlan theih a ni rih lo tih Police te chuan tarlangin, mipuite chu Police hnuchhuitute hmalakna ngaichang zel turin an sawm bawk a ni.