Tourism Deptt. hmalakna thlir

Tourism Department hnuaia hmalakna hrang hrangte thlirletna hun chu Zirtawpni kalta khan Tourism Minister Lalnghinglova Hmar hovin neih a ni.

Tourism Minister Pisa-a he thutkhawm neih ah hian Tourism Minister Lalnghinglova Hmar chuan, “Mizoram-ah hian eng Sector hi nge thang thei ber tih ngun takin thlir ta ila, Tourism hi thang thei ber leh sum leh pai thawkchhuak thei ber turah ka ngai. Amaherawhchu Tourism Department hi hunrei tak Department lian ni lova ngaih a ni lo tawh a, hei hi vawi leh khatah tidanglam nghal vek thei dawn lo mah ila theihtawp kan chhuah zel ang,” tiin hemi kawngah hian awareness leh publicity lamah Multimedia Campaign nen nasa zawka hma kan lak pawh a tul thu a sawi a. Mizoram sawrkar hnuaiah Tourism chu hlawhtlinna tak tak awm theihna tur tak a nih thu a sawi bawk.

He thutkhawm ah hian Tourism Department hmalakna hrang hrangte thlirho in hmachhawp te sawiho a ni a, Winter Festival chu lian leh ngel-nghet zawka hman a, Department hrang hrangte nen tha thawhkhawm a ‘Winter Capital of India’ ni thei tur khawpa hmalak dan tur ngaihtuah a ni a. Awmze nei leh lian zawka awareness campaign leh inzirtirna kalpui te, Chaltlang Tourist Lodge hmuna 4-Star Hotel aia hniam lo sak tur te, Swadesh Darshan-a project thar thehluh tur leh Tourism Calendar leh Event hrang hrangte thlirho a ni a. Tourism Department hnuaia thawktu awm mek leh mamawh belh dan te sawiho a ni bawk.

Tourism Department hnuaia hmasawnna ruhrel (infrastructure) project kalpui mek leh hmachhawpte chipchiar taka thlirho a ni a. Tun dinhmunah cheng vbc. 660.63 hu infrastructure project 17 kalpui mek a nih thu tarlan a ni a. Tourism Department hnuaiah PM-JUGA leh Bana Kaih atangin Mizoram hmun hrang hrangah homestay 189 sak a ni dawn a. Homestay-te hi a sak phung leh rawng inang tlanga sak tum a ni ang.