Mizoram-ah Eklavya Model Residential School (EMRS) thar tur paruk buatsaih mek a ni

Sawrkar chuan Mizoram-ah Eklavya Model Residential School (EMRS) thar tur paruk (6) a buatsaih mek a, tunah hian a building tur sak hna thawh mek a ni.

Thuthar thehdarhtute zawhna chhangin Mizoram EMRS Society hotute chuan Mizoram-a RD Block paruk-ah EMRS Building thar sak mek a nih thu a sawi a. Heng RD Block te hi Sawleng, Khawbung, Khawzawl, Lungsen, Pangzawl leh West Phaileng-ah te a ni a, heng zinga thenkhat chu nikum kumtawp lamah sak tan a nih laiin a then chu kumin kumtir lamah sak tan a ni a, kum 2 (hnih) chhunga sak zawh tura ruahman a nih thu an sawi a ni. 

Mizoram-a Eklavya Model Residential School (EMRS) hmasa ber hi kum 2008 khan Lunglei-ah dah a ni a, hemi hnu hian EMRS Serchhip chu kum 2015 khan hawn leh a ni a. Kum 2020 khan EMRS thar pali- Ngopa, Lawngtlai, Chawngte leh Tuipang-ah te hawn leh a ni a, nikum (2025) khan a dang 5- Tlangnuam, Zawlnuam, Bilkhawtlir, Naohtlah leh Tlungvel te hawn leh a ni a. Heti hian tun dinhmunah Mizoram-ah EMRS function mek hi 11 a awm a ni. 

Eklavya Model Residential School (EMRS) hi Mizoram-ah chuan Mizoram sawrkar Social Welfare & Tribal Affairs Department hnuaia Mizoram EMRS Society hnuaiah enkawl mek nii, NESTS, Ministry of Tribal Affairs chuan Tribal naupang zirna lamah an hnufual bik loh nan a thlawn vekin an lehkha zirna tur senso a rawn tum sak a. Eklavya Model Residential School (EMRS) hi Residential School niin, Tribal naupang tan bik liau liau a thlawn veka lehkha zirna hmun a ni a, Pawl 6 atanga intanin Pawl 12 thlenga lehkha zir theihna hmun a ni.

EMRS School naupangte hi a thlawn vekin School Uniform, Lehkhabu, Bag, Pen, Pencil leh zirna atana mamawh te a inangkhat-a pek an ni a, mi hausa leh rethei fate thliarhrang lovin Mizoram chhunga Mizo naupang tawh phawt chuan khawi hmun atang pawh nise admission a tih theih vek a. Admission tih dawn hian Seat a tam loh avangin Entrance Test leh Medical Examination an paltlang a ngai vek thung a ni.