State Geological Programming Board thutkhawm neih a ni

Kumtin-a neih thin, State Geological Programming Board (SGPB) thutkhawm chu a tum 31-na atan nimin khan neih niin an hmalakna hrang hrangte thlirho a ni.

Secretariat Conference Hall No. I-a SGPB thutkhawm hi Geology & Mining Department Secretary leh State Geological Programming Board (SGPB) Chairman Dr. H. Lianzela chuan kaihruaiin inlawmna thu sawiin, Annual Report of Directorate of Geology & Mining (DGM), Mizoram during 2025-2026 leh Citizen’s Charter during 2025-2026 a tlangzarh a. DGM Geologist V. Lalbiakmawia’n Annual Reports (2025-2026) sawifiahin, SGPB Meeting vawi 30-na minute chu sawiho a nih hnuah pawm a ni a. Directorate of Geology & Mining (DGM), Geological Survey of India (T-M Circle) leh SGPB member ten Action Taken Report pein, Work programme sawihawnna an nei a, chawhnu lamah Agenda hrang hrangte ngaihtuahin an sawiho bawk.

He meeting-ah hian kum 2025-26 chhunga Directorate of Geology & Mining-in Mizoram chhunga a hnathawh te thlirletin kum thar atana a hmachhawpte sawiho a ni a, Mizoram chhunga Line Department leh Agency hrang hrangte nen tang tlanga ruahmanna siam dan turte ngaihtuah a ni a. Chhiatrupna laka mipuite him zawkna turin National Highway, Major District Road leh District Road dangte awmnaa leimin awlsamna leh hlauhawm lai (weak/loose rock formations)-te zawnchhuah dan rawtna siam a nih bakah, leihnuai hausakna zawn kawngah te, Coal Exploration Block thar hawn dan tur leh Mizoram puma Rare Earth Elements (REE) zawnna kalpui zel dan turte sawiho a ni bawk.

Heng bakah hian lung/balu leh leihnuai hausakna dan lova lak chhuah-te khuahkhirhna tur leh dan anga thil kalpui a nih theihna tur ruahmanna sawiho a ni a. Mineral phurh chungchang leh uluk zawka vil a nih theihna tura Mining Check Gate siam belh rawtna bakah, dan lova leilung hausakna (lung leh balu) lakchhuah thinte dan anga kalpui vek a nih theihna turin Mizoram District 11-a District Magistrate-te nen tang hova hmalak dan tur ruahmanna siam a ni bawk a. Sawrkar Laipui inrawlhna tur ang chi a awm chuan Ministry of Mines, Ministry of Coal leh Ministry of Petroleum and Natural Gas-ah te thlen leh tur a ni ang.