Mizoram-a Oil Depot awm theih nan theihtawp chhuah zel tum
Food Civil Supplies & Consumer Affairs Minister B. Lalchhanzova hian nimin khan India Hmarchhak-a Indian Oil hotu, IO-AOD-a Executive Director Nitin Bhatnagar chu a Pisa-a leng-ah sawmin Mizoram-a Oil Depot bun a nih theih nana hmalakna kal mek chungchanga hmasawnna awm tawh te, hmalak zelna tur kawng te a sawipui a. Khuarel chhiatna thleng thei te, thenawm State-a buaina thleng palh emaw, chhiatna thleng thulhah tuialhthei lakluh a harsat thin avangin Mizoram in a dahkhawlna liantham, Oil Depot an mamawh takzet tih a sawi a. State sawrkarin Oil Depot siamna tur hmun engemawzat a enfiah tawh thu leh heng hmunte hi IOCL lam pawhin an rawn endik tawh thu sawiin, a theih dan awm thei apiang umzuiin Mizoram in Oil Depot a neih ngei theihnan theihtawp a chhuah zel dawn thu leh Oil Depot siam nan ram pawh a thlawna company hnena pek tur a awm tur thu a hrilh a. Prime Minister-in Mizoram a rawn tlawh hunah pawh lo thual nawn leh ngei a tum thu Supply Minister chuan a sawi bawk.
IOCL chuan Mizoram-ah Oil Depot din ngei an duh thu leh Mizoram Sawrkara FCS&CA Department te nen an indawrna pawhin hma a sawn zel tih Nitin Bhatnagar chuan sawiin, Chief Minister leh Supply Minister ten hemi kawnga thahnem an ngaihna chuan rah tha a chhuah ngei a beisei thu a sawi a, Company lam leh Ministry of Petroleum and Natural Gas hnenah pawh an theih anga hma an lak ve mek thu Minister hi a hrilh bawk a ni.