MPSC Secretary in MZP te thilphut tih hlawhtlin theih a nih loh dan a sawifiah

Mizo Zirlai Pawl (MZP) ten Mizoram Public Service Commission (MPSC) laka an thilphut tih hlawhtlin ngiata Vawiin atanga MPSC-a thawktute Pisa kai tur dan an tum laiin MPSC Secretary chuan MZP te thilphut chu tih hlawhtlin theih loh a nih dan MZP te a hriattir
MPSC Secretary hian Zirtawpni khan MZP General Hqrs. ah lehkha thawnin MZP ten thilphut chungchang hi a hrilhfiah a, MZP ten ‘One Time Registration (OTR) hi tih tawp ni se, need base in Specific application form siam ni rawh se’ an tih chu tih theih a nih loh thu leh OTR chu hna diltute hmakhua ngaih avang zawka siam a nih thu tarlangin, “OTR profile-a thil pawimawh awm tawh reng reng hi hna dilna atana online application-in a 'capture' mai thin a, hei hi candidate-te tan a awlsam em em bawk. OTR hi tihtawp a nih a, hnaruak zawrhna tihchhuah a nih apianga a hranpa liau liaua document pawimawh thehluh thar ziah ang chi (need base a specific application form siam) hi chu hna diltute hmakhua thlirin pumpelh tir hram zawk hi MPSC duhdan a ni,” a ti a. “OTR hian specific taka document upload ngai thin a nuai bo a, mi in OTR-ah lehkha/document pawimawh a dahluh tawh chuan application nen a inthlunzawm (fetch) nghal avangin hna dang dilna atan pawh a ring zui ngar ngar thei tawh zawk a ni,” a ti a. UPSC hnuaiah chuan OTR hi vawi khat bak thlak danglam phal a nih loh laiin MPSC-ah thung chuan miin qualification thar a neih apiangin a in-update thei reng tih pawh a tarlang bawk.

MZP ten OTR-a document upload kim loh avanga reject zawng zawngte Offline-a document te thehluhna hun siam sak leh Written Exam-a tling tawh, OTR-a document upload kim loh avanga reject tawh te tan Offline-a document submit-na hun siam sak an phut chungchang ah, hei hi tih hlawhtlin a nih chuan hna hmu tawh (appointment pek tawh) mi engemaw zat a tihbuai dawn thu leh Appointment pek fel tawh tih buangbar thar leh chu thil dik lo nasa tak a nih chauh loh chuan Law Court lam pawhin a duh loh thin a nih thu tarlangin, thil tih chi lo ah ngaih a nih thu a tarlang a. Kum 2025-2026 chhung khan hna dilna 50,000 chuang leh kum 2026-2027 ah 20,000 chuang an buaipui tawh thu tarlangin, “Hetih lai hian OTR-a document upload kim lo emaw, dilna khar tawh hnua upload thar ngiat leh te hi mi za nga (500) bawr vel chu an ni thei mai thei a, MPSC-in hna dilna lut a buaipui atanga za zela tehin a sang lem lo hle,” tiin “Mi tam vak lo te buaina chinfel sak tum avanga mi tam zawkte hamthatna leh awlsamna neih mek tihtawp thung si hi MPSC ke penna tur niin a lang lo,” a ti bawk.

Hei bakah hian MPSC Secretary chuan OTR hi an titawp emaw, OTR-a document upload kim lo te avanga offline-a document thehluhna hun an hawnsak leh emaw a nih chuan MPSC chu tu te emaw hamthatna tur bik chauh ngaihtuahna avanga thil ti a ang thei dawn tih pawh tarlangin, “Kan ram Danpui, Article 14 (Equality before the law) leh Article 16 (Equality of opportunity in matters of public employment) palzutna a nih theih dawn avangin thil tih chi a ni lo,” a ti a. “OTR-a document upload lo emaw, upload tlai (dilna hun tawp hnu) avanga dilna hnawlsak tawh te zinga mi thenkhat chu Gauhati High Court, Aizawl Bench-ah an zualko mek a. Court-a thu inchiah lai a ni a, Court in thuchhuah a siam hmaa kan kal dan tih-danglam ngawt hi a remchang lo a ni,” a ti bawk.

MPSC Secretary chuan OTR thatna hrang hrang te pawh MZP te lehkha a thawn ah hian tarlang bawkin, India ram State PSC zingah OTR hmang lo an awm tawh loh hial zawk laia he thil tihtawp emaw, offline-a document thehluh theih hun siam thar chungchang te chu tun dinhmunah chuan sawi thu cheng lo ah an ngaih thu pawh a tarlang a ni.