Serchhip leh Mizoram hmun dang ah Rulhut hlo pek beihpui thlak a ni
‘National Deworming Day August Round 2026’ hi Serchhip District-ah chuan Reproductive & Child Health, National Health Mission (NHM) bultumin Marian High School, Serchhip-ah a hawnna neih a ni a, he hun hi Serchhip SDO (Sadar) Rebecca Laldinmawii Hrahsel chuan khuallian nia hmanpuiin mihring in Rulhut kan pai avanga harsatna kan neih theih te sawiin, he huna kalkhawm zirlaite chu kum la naupang te te, rilru leh taksa ah pawh harhvang tak la ni tur an nih thu sawiin, amaherawh chu Rulhut an pai palh chuan harsatna hrang hrang an taksa ah a awm thei tih hre turin a chah a. Hei vang hian Rulhut hlo ei chu ngai pawimawh tur leh anmahni mai bakah an chhungte leh an unau te hnenah pawh zirtir zel turin a chah bawk a ni.
He hun hi Deputy Chief Medical Officer (Dy. CMO), Dr. Lallawmkimi Chhakchhuak chuan kaihruaiin kut silfai that loh avanga rulhut kai theih dan leh kut sil dan dik (six steps of handwashing) te a sawifiah a. Dr. Fabian Malsawmkima, MO (ARTC) chuan rulhut hlo ei pawimawhzia sawiin, HIV (AIDS) chungchang leh ruihhlo that lohna te a sawi bawk. Marian High School Principal, Father John Zoduhsanga chuan sawrkarin hetiang programme pawimawh tak mai a duang chu lawmawm a tih thu sawiin, Deborah Vanlalchhuangi, District Programme Manager (NHM) chuan lawmthu sawiin hun a hmang bawk a, hemi hnu hian zirlaite hnenah Rulhut hlo semin an ei nghal a ni.
Rulhut hlo ei runpui hi kum khatah vawi hnih - February leh August thlaah te neih thin niin kumin February thla khan a thawh khatnaah hlawhtling takin Serchhip District-ah kalpui a lo ni tawh a, tun tuma a thawh hnihna ah hian Rulhut hlo (Albendazole) chu District chhunga School hrang hrang, College leh Anganwadi Centre-ah te semin ei leh tura ruahman a ni a. Serchhip District chhungah hian Rulhut hlo dawng tur, target beneficiary kum 1 atanga 19 inkar mi 23,160 an awm a; heng zingah hian Anganwadi naupang 4,892; Sawrkar School (Govt. Aided School tiamin) naupang 7,898; Private School naupang 9,893 leh School kal lo naupang 457 bakah Anganwadi kal lo naupang 20 an awm a ni.
National Deworming Day August Round 2026 hi Mizoram District hrang hrangah pawh kalpui a ni a, he rulhut hlo pek beihpui hian rulhut avanga naupang thisen tlachham tur leh hrisel lo tur a veng a, an zirlaia an hnufum lohna tur leh an than chhohna kawnga harsatna thleng thei lakah a veng dawn tih mithiam te chuan an sawi a ni.