Rajya Sabha MP hlui in Chief Minister chu a sawi loh tawp tur sawi ah a puh
MNF Party in nimin-a Mizo Hnam Run Chhung Inkhawm an neih ah Rajya Sabha MP hlui K. Vanlalvena chuan tunhnaia Chief Minister Lalduhoma thusawi sawi chhuakin, “Kan CM hian a sawi loh tawp tur a sawi a ni,” a ti a. “Ram hruaitu kan nih chuan kan tawngkam hi silai; a mu pai ang anih avangin den a nei ngei ngei thin a. Opposition hruaitu anih laia duhdah taka thil a sawi thin anga tawng mai mai hi a dik tawhlo tih kan CM Pu Duha hian a hriat a ngai a ni,” a ti a. “Chief Minister vekin, Mizoram Autonomous District Council te chauh Tribal area anih tawh thu leh Mizoram hmundang zawng zawng hi hlauh-thawn awm ni a a sawi pawh hi thudiklo a ni. Indian Constitution Article 342-a Tribal list-ah Mizo kan tel a, Article 371(G)-ah te Mizorama hnamdang ten hmun lo ram an neih theihlohna tur dan a awm a. Chuvangin, hlauhthawn tur a awm lo” a ti.
ILP chu Indian Consitution Article 19(5) behchhana Tribal te humhim nana hman thin a nih thu pawh K. Vanlalvena chuan sawiin, “Mizoram Accord-ah chu chu nemngheh leh a nih avangin a nghet tawk a ni. Kum 1994, July thlaah India Home Minister SB.Chavan-a’n hmarchhak CM te Shillong-ah kokhawmin, ILP hlih a rawt tum pawh khan nasa taka dodal a ni a. MZP ten Independence Day kan boycott a, August thlaah Special Assembly koin ILP hlih kan remtih loh thu te Mizoram sawrkar chuan a passed a nih kha,” tiin kum 2007-ah ILP hlih tumna awma hriat anih leh avangin MNF sawrkara Law Minister Pu H. Rammawi hovin, All Party leh All NGO aiawh Team chuan thawhpui sawmin State dang te an tlawh thu te a sawi bawk.
MNF chu ramhnuaia a luh hmain Assam State MLA thlan hnuhnung berah MLA seat 3 awmah seat 2-ah hnehtu an nih avangin MNF chuan Zoram mipui ai an awh phak nia sawi bawkin K. Vanlalvena chuan, “MNF leh India inremnaah MNF chu Mizoram mipuite aiawh ni phaklo anga Pu Duha’n thu a sawi mai hi lo ngaihtuah chiang leh rawh se. Khatih laia Mizoram Chief Secretary Pu Lalkhama IAS pawhin hming a sign ngei laia, Mizoram sawrkar aiawha hming sign a nih loh thu a sawi lui talh te phei chu mipuite bum tumna liau liau a ni,” a ti a. “India leh MNF inremna thuthlung hi keini MNF ten ralthuam nena inthlenga kan siam a ni a. Kan remtihna lova thiah emaw, paihbo emaw anih dawn chuan a thleng nan a kan pek, kan ralthuam leh thisen te kha min pek let leh a tul ang,” a ti a, “Zoram mipuite rawng bawl turin i insang mar ang u,” tiin he huna kalkhawm an party mipuite chu a sawm bawk.