Serchhip District-a NH-02 te tun dinhmun ah tha thawkhat ah ngaih niin vil zui zel tum a ni
Serchhip DC ruahmanna in National Highway 02 Inspection Team te chuan Zirtawpni kalta khan Keitum atanga tanin Khumtung thlengin National Highway-02 thawmthat hna thawh mek chu an enfiah leh a, tun dinhmunah kawngpui dinhmun chu duhthusam la ni chiah rih lo mah se a tha thawkhata an hriat thu an sawi a, chutihrual erawh chuan Fur ruahtui tlak lai a nih avangin kawng hi ni hnihkhat thilthu leka la khuar chhe zung zung thei a nih avangin Daily Maintenance kalpui reng turin Contractor te an chah a ni.
National Highway Inspection Team kaihruaitu Addl. DC Dorothy Muansangi chuan NHIDCL hotute leh an hnuaia Contractor (KRAM Infracon Pvt. Ltd., Shivalaya Construction Ltd. leh Bhartia Infra Projects Ltd.) te chu Serchhip District-in kawngpui tha leh tlo kan neih theih nan District Administration Level atangin an vil reng dawn tih hrilhin, MJA leh khawtlang hruaitute nen tangkawpin National Highway Inspection hi an kalpui zel dawn tih a hrilh bakah inthlahdah lo turin a hriattir a a ni.
Serchhip Addl. DC chuan tun dinhmunah ruahtui tlak lai a nih avangin kawng Black topping tih tak tak theih a nih rih loh thu leh kawng khuar chhe zual, lirthei tana tlan hrehawm tur hnawh rih mai a nih thu sawiin, Fur ruahtui tla a reh fel veleh September thla chawhnu lam atangin Serchhip District chhunga National Highway-02 chhia zawng zawngte hi NHIDCL hnuaia Contractor-te hi Black topping tha taka tihtir leh vek an tum thu a sawi a, chutih hunah chuan mipui lam pawhin hmanraw tha lo hman an tum em tihte lo enpuia, a tha lo leh mit tlung lo te chu District thuneitute hnena hriattir zel tur te, chumi atan chuan 'Vantlang Viltu App' te pawh mipui ten hmang tangkai tura a duh thu te a sawi bawk.
Heetihlai hian Serchhip by-pass Road enkawltu KRAM Infracon Pvt. Ltd. te chu Inrinni atang khan NH-02 Serchhip By-Pass Road, Kikawn to Sailiamkawn inkar kawng chhia thawmthat hna thawk tan tura tih niin ni 7 chhungin a chhe zual thawmthat hna hi zawhfel tum a ni.