MLA leh MDC nih khawp theih lohna chu ennawn leh turin ngenna thehluh tum
Chakma Autonomous District Council (CADC) leh Mara Autonomous District Council (MADC) a Member of District Council (MDC) te MLA nen an ni kawp thei lo ti a khinna chu Gauhati High Court chuan a hnawl tawh a. High Court hian an nih kawp theih lohna tur Dan tlawhchhan a awm lo niin a sawi a. High Court thutlukna hi Supreme Court chuan tunhnai khan hnawlin, ‘MDC leh MLA nih kawp theih a ni lo,’ a ti a. He Court sang ber thutlukna hi ennawn leh turin MLA, RM. Chakma hian Supreme Court-ah vek ‘Review Petition’ thehluh a tum thu a sawi a ni.
Tuichawng Bialtu MLA Rasik Mohan Chakma chuan LADC in kum 2010 khan MLA leh MDC nih kawp theih lohna hi a lo hnawl tawh niin a sawi a. Autonomous District Council-te hian India Constitution Sixth Schedule angin MLA leh MDC nih kawp theih lohna Dan siam thei tur hian thuneihna an nei lo tih a sawi bakah Supreme Court hian he thil hi a ngaihtuah chiang tawk lova a ngaih thu a sawi a ni.
Supreme Court-a Chief Justice of India Surya Kant, Justice Joymalya Bagchi leh Justice V. Mohana te thutna Division Bench chuan Gauhati High Court thutlukna lo siam tawh hi a hnawl bakah Rustom Chakma thu thlen chu pawmin CADC leh MADC in MLA leh MDC nih kawp phalna Dan an lo siam chu thla thum (3) chhunga siamtha turin a ti a. Supreme Court thupek ang hian CADC-in ni 2 awh inkhawm hmanhmawhthlak a koh-ah Zirtawpni khan CADC (Constitution, Conduct of Business, etc.) (Ninth Amendment) Rules, 2026 chu pawm a ni a, MLA leh MDC nihna chelh kawp theih thin chu a theih dawn ta rih lo a ni.
Hetianga MLA leh MDC a nih kawp theih tak loh avang hian MLA leh CADC-a MDC ni kawp RM. Chakma leh Congress MLA neih chhun, LADC-a MDC ni kawp bawk C. Ngunlianchunga te dinhmun tur a chiang ta lo niin a ngaih theih a. Hemi chungchang ah hian Supreme Court thu hi tih danglam a nih loh chuan heng MLA leh MDC ni kawp te hian an nihna pakhat hi an chawlhsan a tul dawn niin a lang a ni.