Serchhip damdawi In sak hna chhunzawm a ni tih sawi
Hemi chungchanga thuchhuah an siamah ZPM Serchhip Block chuan Serchhip Damdawi In (District Hospital) Block-A sak hna Zamzo Construction ten an thawh chu hun engemaw chen chawlh lailawk a nih hnuah cheng nuai 34 hmuin an chhunzawm leh thu leh hemi bakah hian PGCIL atanga pawisa ruahman cheng vbc. 21 a tel lo, Parking siamna atan liau liau a Chief Minister, Bialtu MLA Lalduhoma'n a ruahman cheng nuai 125 chu tunkar chho hian tifelin pekchhuah a ni leh dawn tih an sawi a, chak lehzualin hna kalpui theih a ni dawn bawk tih an sawi a ni.
Hei bakah hian Block-B (tuna sak mek Block-A chhakah) North East Special Infrastructure Development Scheme (NESIDS) sum cheng nuai 4800 in sak a ni leh dawn tih pawh sawiin, “He hna thawk tur hian SR Construction te thlan fel a ni tawh a. Anni pawh hian hnathawh dan tur August ni 7, 2026 khan Engineer te nen an rawn enfel leh tawh a. Block-A sak mek nen hian indip buai lutuk lova hna thawh theih pawh an in beisei a ni,” an ti bawk.