Sangau-a SDO (C) function dan tur sawiho

Nimin khan Lawngtlai Bawrhsap Pisa-ah Sangau-a Sub-Divisional Officer (Civil) Office function dan tur sawiho a ni.

He sawihona hi Lawngtlai Bawrhsap Donny Lalruatsanga kaihhruaia neih niin Central YLA leh YLA Sub-Hqrs. Sangau hmalakna kal zelah SDO (C) Office hna Sangau BDO-in a kawp thin chu a hrana mumal zawk a hnathawh tir bakah thuamthat ngaite thuamtha tura theihtawp chhuah a nih thu a sawi a, GAD lam pawh hemi atana tul leh pawimawh ah biak a nih tawh thu sawiin, SDO (C) Office amaha function turin tan tlan a pawimawh thu leh chak taka hmalak zel a nih tur thu a sawi bawk.

He hunah hian Central YLA leh YLA Sub-Hqrs. Sangau te chuan kum 25 chuang zet SDO (C) Office a awm tawh hnu pawha tun thlenga amaha a la 'fuction' lo chu veiawm an tih thu an sawi a. Kawng hrang hranga hmalakna an neih tawh thu sawiin, an ngenna ngaipawimawha hmalakpuitu Lawngtlai Bawrhsap chungah lawmthu sawiin, an hlawhtlin ngei an beisei thu an sawi bawk a ni.

Nimin-a thutkhawm ah hian SDO (C) Office, Sangau mumal taka kalpui a nih theihna tura pawimawh hrang hrangte sawiho a ni a. Assistant 1, UDC 1, LDC 1 leh Group-D mi 2 bakah Driver pakhat mamawh a nih thu tarlan a ni a. Assistant hi DP&AR lama thlen nise, UDC hi MPSC in a lak hun nghah nise, LDC leh Group D hi DC Office lamin lak phalna an hmuh hun ah lak nise tiin, Driver hi DC Office, Lawngtlai atanga pek tura tih a ni bawk. Office function-na tur atana mamawh (Furnitures) hrang hrangte requirement siamin thehluh nise tih a ni bawk a. a hranpa a SDO(C) Office a lo function lailawkna turin BDO, Sangau chu ruahmanna lo siam tura tih a ni bawk.

He hunah hian Sangau BDO, Thomas Maratha Hlychho chuan report pein SDO (C), Sangau-ah Office building, Staff Quarter (Chhawng) pakhat leh Staff Quarter (Assam Type) pahnih awmin, BDO, Sangau in kawp mek tih a sawi a, a tul leh pawimawh dan angin Certificate Issue, Addhaar siam, NOC, Order leh Hriattirna tihchhuah thin a nih thu a sawi bawk. He sawihona hunah hian SDO (C)/BDO, Sangau, DC Office-a Superintendent, CYLA hruaitute, YLA Sub-Hqrs. Sangai-a President leh Secretary leh MJA Lawngtlai hruaitute an tel a ni.