Ruang phurhna atan cheng nuai 294.45 sen a ni tawh

Mizoram sawrkar chuan khaw danga ruang phurh man a tumsak mekah Social Welfare & Tribal Affairs Department chhinchhiah danin tun thlengin Rs. 2,94,45,154 sen a ni tawh.

Thudawn danin, sawrkarin ruang phurh man a tum tan December 2024 atangin ruang 2,791 phurhna atan Rs. 2,94,45,154 sen a ni tawh a. Ruang phurh a man hi a luh hmasak dan indawtin a tahtawlin pek-chhuah zel a ni thin a ni. Mizoram sawrkarin ruang phurh a kalpui hi September 1, 2024 atanga hman tan a ni a, tunah chuan awlsam zawkin Ruang Phurh Online Portal hmangin emaw, App kaltlangin emaw a dil theih tawh a. Ruang Phurh online portal hi Mizoram State e-Governance Society (MseGS), ICT Department siam a ni a, ruang phurh sawrkar sum hmanga kalpui mek chu chak zawka kalpui a nih theih nan leh mi tam zawkin awlsam zawk a an chhawr theih nan ruahman a ni.

Mizoram sawrkar chuan khaw danga thi ruang phurhna senso atan hian kum 2024-25 leh kum 2025-26 atan Budget-ah cheng nuai 500 ve ve a lo dah tawh a, kumin kum kal mek 2026-27 ah pawh budget-ah hian cheng nuai 500 bawk a dah leh a. Ruang phurh inkaihhruaina in a tarlan danin, ruang phurh tur chu a thlenna tur km 20 aia hnai a ni tur a ni lo a, km 20 piah lamah chuan tu tan pawh hman theih niin, lirthei thlen theih chin a huam a ni.

Inkaihhruaina ang chuan, ruang phurhna lirthei hman man chu State Transport Authority in rate a siam anga kalpui a ni a, ruang phurhna man sawrkarin a peksak hian lirthei pakhat chiah a huam a, lirthei hman theihah hian cheng nuai 17 man chin chunglam lirthei a huam lo thung a ni.

Ruang phurhna hlat zawng chhut nan ruang chhuahna atanga a dahna hmun inkar hlat zawng lak tur a ni a, lirthei thlen lohna khua a nih chuan lirthei thlen theih tawpna thleng tum sak theih a ni. Ruang phurhna chu kawng tawi thei ber hman tura ruahman a ni bawk.