Ramrikawn to Zihnghalkawn inkar kawng siam mek Bialtu MLA in a tlawh

Adviser to Chief Minister (Finance & Planning) leh Aizawl West-I Bialtu MLA, TBC. Lalvenchhunga chuan nimin khan a Bial chhunga Sakawrtuichhun panna kawng, Ramrikawn - Zihnghalkawn inkar kawng siam mek chu a hmunah kalin a endik.
Bialtu MLA hian amah lo dawngsawngtu khawtlang hruaitute hnenah kawng siam mek leh Fur in nang ching avanga mipuiin harsatna an tawh mek chu sawrkarin a hriatpui tih sawiin, khawtlang mipuite mamawh hre reng chungin sawrkarin ngawrh taka kawng siamthat hna a kalpui zel thu a sawi a. Ramrikawn - Zihnghalkawn kawng chu double lane-a siamna tur chu sawrkar hmasa hun ah Central Road Fund atanga hmuh a nih tawh thu sawiin, Land acquisition tihfel theih loha a awm reng avangin hun rei tak kawng siamthat chu tihpuitlin a ni lo, a ti a. Sawrkarin nasa taka a bawhzui hnua kawng siamthat hna tan theih a ni ta chu lawmawm a tih thu a sawi a. Kawng pavement siamna atan Ministry lamin funding an sanction tel loh avang leh land acquisition thenkhat tihfel ngai a la awm avangin duh angin kawng siam hna thawh a chak theih loh thu a sawi bawk.

He kawng siam mek chungchangah hian Joint Action Committee on Sakawrtuichhun Road te chuan thuneitute hnenah lehkha an thlen tawh thu pawh Bialtu MLA chuan sawiin, khawtlang hruaitute nen an inbiak fo thu leh a line department leh central ministry lamah pavement siamna atan chak taka funding bawhzui mek a nih thu a sawi bawk.