Raltlante Mizoram dan leh khalphung te hrilh hriat tul ti

Disaster Management & Rehabilitation Department changtu Minister Prof. Lalnilawma chuan raltlante chu Mizoram dan leh kalphung te hrilh hriat a pawimawh thu a sawi.

Adventist Development Relief Agency (ADRA) chuan nimin khan Aizawl-a I&PR Conference Hall-ah ‘State Level Meeting to Strengthen Humanitarian Coordination, Preparedness and Response in Mizoram’ hun hmangin he hun hi a hman-puina ah DM&R Minister Prof. Lalnilawma chuan, kum 18 kalta a Mautam laiin ADRA te’n Mizoram mipuite an puih nasatzia sawiin, tunah pawh Mizoram sawrkar nena thawhhona tha tak an nei chu lawmawm a tih thu a sawi a. Mizoram sawrkar chuan ADRA te a puih reng tur thu sawiin, thawkho zel turin a chah a. Mizoram sawrkarin theih tawpin raltlan te a tuamhlawm thin tih sawiin, a Department chan DM&R leh PHE lam pawhin raltlante tan tui thianghlim leh an tawm hulna tur silpauline te an phak tawkah an pek thin thu a sawi bawk.

Minister chuan Myanmar atanga raltlan lo lutte chu tum reng vang ni lova Mizoram-a lo kal an nih thu leh harsatna tam tak an tawh thu a tarlang a. Raltlante chuan tui thianghlim, In leh lo tha zawk leh rilru lam enkawlna bakah Legal documentation lamah harsatna an neih thu a sawi a. Minister chuan Dan lova ruihhlo leh thil phal loh dang tawlh chungchangah raltlan hming a lang leh thin chu pawi a tih thu leh hetiang thil hi raltlan te chuan ti tawh lo tura a duh thu a sawi bawk a.  Raltlante chu Mizoram chunga khawtlang mite nen inrem a, hriatthiam lohna leh harsatna a thlen loh nan Mizoram dan leh kalphungte hrilhhriat a pawimawh tih a sawi bawk a. Mizoram sawrkar, tualchhung khaw-tlang leh NGO-te thawhho a pawimawh thu a sawi bawk.