Mualthuam North tleirawl bo an khua ah a ruang chhar a ni
Thudawn danin Mualthuam North a cheng kum 15 mi, H. Ramdinpuii D/o H. Lalawmpuia hi tunkar Thawhtanni (August 3, 2026) zan khan an In atang hian chhuakin chin hriat lohin a awm zui a, a chhuah hma hian a chhungte Phone khawihin a chhuah chhan tak hi hriat ni lo mah se lungawi lohna neia chhuak erawh a ni lo nia thudawn a ni a, Thawhlehni atang khan zawn nghal niin nizan hmasa khan zankhua-a zawn leh a nih hnuah nimin chawhma dar 10:30 vel khan Mualthuam North M/S bul hnimbuk karah a ruang hi hmuh a ni ta a ni. Thudawn danin H. Ramdinpuii hi mu kut tuara thi ngei niin a lang a, a nghawng-ah chem-a zaina hnuhma hmun hnih ah awmin a ruang an chharna hmun hi a hma pawhin an lo en tawh nia sawi a ni bawk.
He thil thlenna hmun hi nimin khan Lunglei atangin Police te chuan pan nghalin thil tih tur tul ang angte an buaipui nghal a, a ruang hi Vawiin hian Lunglei-ah Postmortem tur niin hemi hnu hian vui hun tur tihfel a ni ang. H. Ramdinpuii hi Mualthuam North H/S-ah pawl 10 zirlai niin unau pali zinga a upa ber a ni.
Mizo Zirlai Pawl (MZP) General Hqrs. chuan an zirlaipui H. Ramdinpuii thihna chu pawi an tih thu leh hriatthiam harsa an tih thu an sawi a, “Kan zirlaipui laka hetiang thil thleng hi kan en liam mai mai dawn lo a, Dan leh thupek kengkhawhtu te’n uluk taka chhui zui a, pawikhawihtu hi zawng chhuak ngei tur leh a nà thei ang bera hremna pe ngei turin MZP chuan a phût tlat a ni,” an ti a. Mizo Hmeichhe Insuihkhawm Pawl (MHIP) General Hqrs. pawhin he thil thleng hi pawi an tih thu leh a rang lama a thih chhan chiang taka chhuichhuah vat a nih theih nan leh pawikhawihtu an awm a nih chuan a phu tawk hremna pek ngei a nih theih nan theihtawpin hma an la zel dawn tih an sawi bawk.