New Delhi-ah Mizo thilsiam zawrhna tur MadebyMizo Kios hawn a ni
Sawrkar laipui Ministry of MSME hnuaia Scheme pakhat RAMP hmanga Mizoram Handloom & Handicrafts Development Corporation Ltd. (ZOHANDCO) hmalakna a din MadebyMizo Kiosk hi Chief Minister hian 102 Humayunpur, Safdarjung Enclave, New Delhi-ah hawngin he Scheme-ah hian ZO-HANDCO hi State Nodal Agency (SNA) niin he Scheme hnuaia Component pakhat, Marketing Intervention bikah mawhphurhna a la bawk a. Marketing Intervention hnuaiah hian ZOHANDCO chuan MadebyMizo.com (e-commerce) platform a lo launch tawh a. He e-commerce-a Mizote siamchhuah bungrua an ziahluhte chu a taka zawrhchhuah a nih theih nan MadebyMizo Kiosk hi din a ni a. New Delhi bakah hian Bengaluru leh Kolkata-ah te din turin tunah hian ZOHANDCO chuan hmalakna a kalpui mek a ni.
Heng Kiosk atang hian bungrua hralhchhuah an nih dawn bakah e-commerce atanga online order awm te Aizawl atanga thawn vek lovin heng kiosk atang te hian an pechhuak thei dawn bawk a. MadebyMizo Kiosk hi 750 sq ft a lian niin a din nan cheng nuai 71.41 hman a ni.
MadebyMizo Kiosk hawnna neih a nih hnu hian Kidang Restaurant, Safdurjung Enclave-ah Chief Minister’s Grand Dinner neih chhunzawm a ni a. He hunah hian Chief Minister chuan Mizoram-a PSU te chu sawrkar tan phurhrit ni thin tih sawiin, “Kan sawrkar hnuah siamthat hna nasa takin kan thawk a, tunhnaia ZOHANDCO hmasawn dan hian chu chu a lanchian tir hle a ni,” a ti bawk.
He hunah hian Chief Minister hi Mizoram Lok Sabha MP Richard Vanlalhmangaiha leh Rajya Sabha MP K. Laltluangkima bakah RD&AD Minister Prof. Lalnilawma, ZOHANDCO Chairman J.K. Dawngzuala leh Official dang ten an tawiawm a ni.