MZP in Vawiin leh naktuk-ah ‘MPSC siamthat hnatlang’ an ko

Mizo Zirlai Pawl (MZP) chuan Vawiin, August 6 leh naktuk, August 7-ah te hian ‘MPSC siamthat hnatlang’ an ko tih an sawi.

Tunhnaia Mizoram Public Service Commission (MPSC) hnuaia exam hrang hrangah zirlaite leh Mizo thalai hna zawng mek ten harsatna an tawh thin chungchang chu Mizo Zirlai Pawl (MZP) General Hqrs. Emergency Executive Committee in a ngaihtuah hnuah leh Aspirant hrang hrangte nena an sawiho hnuah MZP chuan Vawiin, August 6, 2026 leh naktuk, August 7, 2026-ah hian ‘MPSC siamthat hnatlang’ an ko tih an sawi a, hetah hian MPSC Pisa kawt-ah tharum thawh lova lungawi lohna lantir an tum thu an sawi a. Mizo thalai hna zawng mek te, MPSC-a harsatna tawk mek te leh MPSC siam that duhtu te zawng zawngte tel turin an sawm tih an sawi a ni.

MZP chuan One Time Registration (OTR) chu tihtawp an duh thu leh a tul dan azir (Need based) in Specific application form siam an phut thu sawiin, OTR-a Document upload kim loh avanga reject zawng zawngte chu Offline-a document te thehluhna hun siamsak an phut thu an sawi a. Written exam-a tling tawh, OTR-a document upload kim loh avanga reject tawh te tan Offline a document submit-na hun siam sak an phut thu pawh sawiin, “Mizoram Public Service Commission (MPSC) kalphung siam that vek ni rawh se, sawrkarin Reform Committee/Commission din rawh se,” an ti bawk a. Heng an hmalakna hian awmzia a nei lo a nih chuan zirlai hna zawng mek ten an dikna chanvo an hmuh theihna tur leh MPSC zahawmna humhim a nih theihna turin a tawp thlengin ke an pen zel dawn tih an sawi bawk.